युरोकप २०१२या 'ड्र' सार्वजनिक

Posted on Sat Dec 3, 2011 3:52 pm NST

हलिमय् लोकह्वाःगु युरोकप २०१२ धेंधेंबल्लाया 'ड्र' सार्वजनिक याःगु दु । फुटबलया विश्व संगठन फिफां शनिवाः छगू ज्याझ्वः यानाः उगु 'ड्र' सार्वजनिक याःगु खः । सार्वजनिक याःगु 'ड्र' कथं बेलायत थाकूगु पुचलय् लाःगु दु । थीथी पुचः व उगु पुचलय् दुथ्याःगु देय्या नांत थुकथं दु

पुचः 'ए' : पोल्याण्ड, ग्रिस, रुस व चेक रिपब्लिक
पुचः 'बी' : नेदरल्याण्ड, डेनमार्क, जर्मनी व पोर्चुगल
पुचः 'सी' : स्पेन, इटाली, आयरल्याण्ड व क्रोएसिया
पुचः 'डी' : युक्रेन, स्वीडेन, फ्रान्स व बेलायत

वइगु सन् २०१२या जुन ८ तारिख निंसें न्ह्याइगु युरोकप धेंधेंबल्ला पोल्याण्ड व युक्रेनं मंकाः कथं ग्वसाः ग्वयेत्यंगु खः । धेंधेंबल्लाया उलेज्या पोल्याण्डया नेशनल स्टेडियम वार्सय् जुइगु ज्याझ्वः दु ।