बडिगार्ड [चिबाखं]
सुजिता माःजु
बलिउडया चर्चित हिरो - सलमान खान । सलमानया नामं हे फिल्म लोकंहृवाइगु । टिनेज मिस्त सलमान धालकि हुरुक्क । बडिगार्ड फिल्मया हिरो नं थ्वहे सलमान । जि ला टिनेज मखु तर भिन्चाया इनापय् बडिगार्ड स्वयेत गुण सिनेमा वना । टिकट कयाः सिनेमा हलय् निम्हं दुहां वना ।
ख्युं लकसय् सलमान खानया एक्सन व रियाक्सनं स्वकुमि सकसित झुमिं यंकाच्वन । गुबलें तालि गुबलें खालि । सकलें ध्यानमग्न सिनेमाया पर्दाय् । मानौं सकलें स्वर्गीय संसारय् प्याखं हुलाच्वन, म्वानाच्वन । उघ्रिमय हलय् दुने छम्ह मिसामचाया हासः तायेदयावल । सकसिगु ध्यान भंग जुल । मिसामचाया सलय् सकसिगु ध्यान केन्द्रीत जुल । 'छाय् छाय्, छु जुल, छु जुल' मेपिनिगु सः नं द्यतनावल । छत्थुं सकलें दन, हाल -'मत च्याकि मत च्याकि ।' लकस भयावह जुल । भुखाय् ब्वल ला ? लुटपाट जुल ला ? जिगु न्हकुसं तिंतिंस्वात । लिक्क च्वंम्ह भिन्चां जितः कत्तिक ज्वन । ख्युंहल दुने प्वाक्क मत च्यात । ख्युंहल छत्थुं झलमल जुल । निम्ह मिजं लुखां सुतुक्क पिहांवंगु खन । हां भुनेथें हुल छथाय्चाय् मुन । मिसासः वहे हुल दथुं पिज्वयाच्वन । न्हृयाइपु दथुइ म्हाइपु थ्वयाच्वन । 'छाय् ख्वल थें -' जिगु मानसपतलय् न्ह्यसःचिं दन । हुलमुल धिनाः दथुइ वना । मोहनीया इलय् आगमय् हँय् स्याइबलय् हि म्हुकेथें मिसामचाया सिटय् हि खना । 'हि गनं वल सलमानया नामय् बलि सुनां बिल ?' लिक्कच्वंपिंसं 'छु जुल' धाधां मिसामचाया छ्यनय् पित्तुपिल । मिसामचा दनेत स्वल, दनेगु कुतः र्ब्यर्थ जुल । ख्वयेगु व ह्ययेकेगु दथुइ संघर्ष जुल । झलमल लकस दुने तीजक प्यखें मिखा ब्वयेका । ख्वाः ह्याउँकाच्वंपिं सलमान खान..... बडिगार्ड जुयाच्वंपिं सलमान खान जक खना । उफ ! गुलि सलमान खान । जितः दिक्क चाल । 'थन सलमान खान अप्वल, छेँय् लिहाँवने नु ।' जिं तिजक भिन्चायात धया । भिन्चां नं मौन स्वीकृति बिल । निम्हं हलं पिहाँवया । पूमवंगु बडिगार्ड बांला बांमलाः जिं मुल्यांकन यायेमसल । गपाय्सकं बांलाःगु फिल्म स्वयेमखन का धेवा जक सितिंवन धकाः भिन्चा तिंतिं न्हूबलय् जितः नं फिल्म बांलाः थें हे ताल ।
लँय् न्यासी ववं भिन्चां न्यन -'हानं बडिगार्ड न्ह्याइतिनि ला ?'
जिं तिजक धया -'गुबले तक मिसाया सृष्टि जुइ उबले तक बडिगार्ड न्ह्याइ ।'
जिगु लिसः भिन्चां मथुल ला थें जिगु मिखा तुंक्क स्वयाच्वन ।
Related Stories
सांसद ल्यासिपिं ल्यत्तु ल्यः जुया जः ठमेलMore Stories Like this
बाखं च्वये मखुनी परिवेश (मुक्तक बाखं) बायावंगु लँपु हेँग्वाः जूम्ह मनू ब्लू-डल बाखं ब्वनेधुंकाः
