नेपालभाषाया मचा उपन्यास
ख्वप (सन्ध्या टाइम्स)/ सिर्जना अभियानया ग्वसालय् बाखंच्वमि रीतादेवी प्रधान जोशीया मचा उपन्यास 'नवाइम्ह छुँ' पितब्वज्या जुल। ख्वपय् जूगु उगु ज्याझ्वलय् नांजाःम्ह बाखंच्वमि रामशेखरं सफूया पितब्वज्या यासें मस्तय्त यइपुक्क उपन्यासय् छुँया बाखं न्ह्याकातःगु खँ कनादिल।
सफूयात कयाः टिप्पणी यासें बाखं च्वमि व प्राज्ञ रीना तुलाधरं उपन्यासं मस्तय्त नैतिक शिक्षा न्ह्यइपुक बियातःगु दु धयादिल।
वरिष्ठ बाखं च्वमि व बाखं दबूया नायः लक्ष्मण राजवंशीं नेपालभाषाय् बालसाहित्यया अभाव जुयाच्वंगुयात वाःचायेकेमाःगु अवस्था वःगु दु धयादिल।
सिर्जना अभियानया नायः धनमान श्रेष्ठया सभापतित्वय् जूगु उगु ज्याझ्वलय् निबन्धकार तेजेश्वरबाबु ग्वंगः, बाखंच्वमि धुव मधिकर्मी, भाषासेवी रत्नगोपाल सैंजू व बाखं च्वमि रत्न कोजूपिंसं नं नवानादिल।
थ्व स्वयां न्ह्यः नेपालभाषाया मचा उपन्यास मय्जु शशिकला मानन्धरया 'चिचिपागु ल्हाः' पिहां वःगु खः।
