लडाकु समायोजन: अप्वःपिंत छु यायेगु?

शिविरय् च्वनाच्वंपिं लडाकु मध्ये नेपाली सेनाय् समायोजन जू वनीपिं लडाकुतय् ल्याःयात कयाः समस्या पिहां वःगु दु। माओवादीं मेमेगु दलतलिसे याःगु सहमतिइ ६५०० म्ह लडाकुयात सेनाय् समायोजन यायेगु खँ उल्लेख दु तर आः जूगु पुनर्वर्गीकरणय् धाःसा ९,००० स्वयां अप्वः लडाकुं समायोजनय् वनेगु इच्छा याःगुलिं अप्वः जूपिं लडाकुयात छु यायेगु धइगु समस्या पिहां वःगु खः। खतुं समायोजनय् वनेगु धकाः इच्छा याःपिनि ल्याः ९,००० दुसां उमित सेनां छनौट याइबलय् थ्व ल्याः अझ कुहां वइ तिनि। अथे खःसां समायोजनय् वने लायक लडाकुया ल्याः ६५०० स्वयां अप्वः दइगु धाःसा निश्चित दु। उकिं उमिगु सवालय् छु यायेगु धइगु समस्या पिहां वइगु नं निश्चित खः। सेनाय् वनेत लायक जुयां नं वने मखंपिनि लागिं छु यायेगु धकाः आः तक न सरकारं छुं धाःगु दु, न माओवादीं हे छुं याःगु दु। थुपिं स्वेच्छिक अवकास मकाइपिं नं मखु, पुनर्स्थापनाय् वनीपिं नं मखु। थुमिगु लागिं छु यायेगु? थुमित अथें त्वःता छ्वयेगु धइगु नं खँ जुइ मखु। छगू इलय् सैन्य पुचलय् च्वनाः ज्या यायेधुंकूपिं लडाकुतय्त अथें त्वःता छ्वत धाःसा थुपिं निराश जुयाः मेगु बांमलाःगु ज्याय् लगे जुइफु। थुपिंपाखें देशय् अशान्ति ब्वलन धाःसा उकिया भागिदार माओवादी जक मखु मेमेगु पार्टी नं जुइ माली। समायोजनय् वनीपिं अप्वःगुलिं थुकिया ल्याः अप्वयेके माल धकाः माओवादीं विपक्षी दल कांग्रेसयात इनाप याःगु दुसा कांग्रेसं उकियात अस्वीकार यायेधुंकूगु दु। थुकिं समस्या जटिल मोडय् थ्यंगु अनुमान यायेफु तर कन्हय् ब्वलनीगु समस्या प्रति धाःसा सकलें गम्भीर जुयाः निर्णय यायेमाः।

More Stories Like this