नेपाल संवत्या कार्यदलं छु याइ?

नरेशवीर शाक्य
नेपाल संवत्या आन्दोलनय् छुं नं कथंया सहभागिता मदुपिं, अध्ययन मदुपिंसं नेपाल संवत्यात आधिकारिक मान्यता बीगु निंतिं सकारात्मक पलाः न्ह्याकी धयागु आशा यायेगु नं पाय्छि जुइ मखु।

नेपाल संवत् नेपाःया राष्ट्रिय संवत् खयाः नं थुकिं आधिकारिक छ्यलाबुलाया मान्यता काये मफयाच्वंगु तसकं दुःखया खँ खः। नेपाः सरकारं थुकियात राष्ट्रिय संवत् धकाः घोषणा यायेगु, तर थुकिया छ्यलाबुला गन जुइ धयागु खँ स्वय्म सरकारं हे प्रस्ट याये फयाच्वंगु स्थिति मदु। थ्व संवत्यात आधिकारिक रुपं छ्यलाबुला हयेत सरकारं गुज्वःगु पलाः न्ह्याकाच्वंगु दु धयागु खँय् नं अधिकांश मनूतय्गु जिज्ञासा जुयाच्वंगु दु।
थ्व खँ ल्हायेबलय् नेपाल संवत्या न्हूदँ छन्हु न्ह्यः डा. बाबुराम भट्टराईया मन्त्रिपरिषदं स्वम्ह दुजःया संवत् सम्बन्धी कार्यदल नीस्वंगु खँ सकसिनं लुमंकाः हइ। थ्व कार्यदल घोषणा जूगु इलय् हे थुकिं ज्या याइगु खः ला धइगु अनेक आशंका ब्वलना वःगु खः। छगू ला थ्व कार्यदलया संयोजक यानातःम्ह नेपालभाषा मंकाः खलःया नायः पद्मरत्न तुलाधरयाके हे सल्लाह मजुइकं वय्कःया नां घोषणा जूगु खँ वय्कलं धयाच्वंगु दु। उगु इलय् वय्कःया ब्यस्तताया कारणं क्वःछिनातःगु लच्छिया ई दुने सरकारयात प्रतिवेदन लःल्हाये मफइगु खँ पिदने धुंकूगु दु। लच्छिया दुने प्रतिवेदन हे सरकारयात लःल्हायेमाःगु थासय् मुक्कं छकः जक मुँज्या च्वने फुगु दुसा आः तक नं थुगु कार्यदलया कार्यक्षेत्र छु खः धयागु खँ स्वय्म सदस्य दुजःतय्सं धयाच्वंगु दु।
नेपाल संवत्यात राष्ट्रिय मान्यता दयेमाः धयागु आन्दोलन न्ह्यानाच्वंगु इलंनिसें हे नेपाल संवत्यात सरकारीस्तरं छ्यलाबुलाय् हयेगु निंतिं सरकारी स्तरया कार्यदल नीस्वनेमाःगु माग थ्व आन्दोलनय् सहभागी जुयाच्वंपिंसं याना वयाच्वंगु खःसां सरकारपाखें हे अलमल यानाः कार्यदल नीमस्वँसें अथें तयातःगु खः। तर अप्रत्याशित रुपं घोषणा जूगु थुगु कार्यदल केवल न्हूदँया इलय् नेवाःतय्गु भावनाय् खेलवाद यायेत जकं मखुला धयागु न्ह्यसः आः बुलुहुँ ब्वलना वयाच्वंगु दु।
थ्व आयोगं छुं ज्या यायेगु धयागु खँ अझं स्पष्ट मजूगु खँ पिदनाच्वंगु दु। थुकिया ज्या यायेगु लक्ष्य Terms of reference स्पष्ट मजुइकं कार्यदलया दुजःतय्सं ज्या याये मफइगु स्पष्ट दु। उकथं हे सरकारीस्तरं निर्माण जूगु थुगु कार्यदलया संयोजन भूमिका सुनां म्हितीगु धयागु नं स्पष्ट जुइ फयाच्वंगु मदु। संयोजक थः हे ब्वाँय् जुयाः फुक्कं ज्या यायेमाःगु खःकि मेकथंया छुं ग्वाहालि सरकारं बीगु खः थ्व जिज्ञासा आम मनूतय्के ब्वलना वयाच्वंगु दु।
दकलय् तःधंगु न्ह्यसः थ्व आयोगं नेपाल संवत्या अधिकारकर्मीतय्सं यानाच्वंगु आन्दोलनकथं नेपाल संवत्यात आधिकारिकरुपं छ्यलाबुलाय् हयेगु निंतिं कार्ययोजना तयार याइगु खः कि राष्ट्रिय संवत्या नीति दयेकेमाःगुया निंतिं ज्या यायेमाःगु खः थ्व स्पष्ट जुइमाल।
हालय् किरात यले संवत् अध्ययन समिति व नेपाल प्रज्ञा प्रतिष्ठानया मंकाः कुतलय् नेपालय् प्रचलनय् दुगु संवत बारे छगू बिचाः गोष्ठी यात। थुकी नेपाल संवत् लगायत मेमेगु संवत्या विषय नं ज्यापौ न्ह्यब्वयेगु ज्या जुल। नेपाल संवत् थेंज्याःगु ऐतिहासिक महत्व दुगु संवत्यात नं मेमेगु सीमित लागाय् छ्यलाबुलाय् वयाच्वंगु संवत्त नापं तयाः बिचाः गोष्ठी यायेगु धयागु नेपाल संवत्या आधिकारिक मान्यता खः कि थुगु संवत्या अवमूल्यन यायेगु ज्या जूगु खः थुकिया नं चिन्तन जुइमाःगु दु। नेपाल संवत् थेंज्याःगु इतिहास व छ्यलाबुलाया परम्परा दुगु संवत्यात मेमेगु संवत् नाप दानाः उकिया गरिमायात म्हो यायेगु ज्या जुइ मजिउ।
आः नीस्वनातःगु संवत् सम्बन्धीया कार्यदलं नं नेपाल संवत्यात गुकथं आधिकारिक कथं छ्यलाबुलाय् हये फइ धयागु खँय् जक ध्यान केन्द्रित जुयाः ज्या जुइमाःगु खनेदु। नेपाल संवत्या आन्दोलन धयागु थुकियात यथोचित राष्ट्रिय सम्मान बीकेगु खः न त छुं नं संवत्यात थकायेगु वा क्वकायेगु मखु। आः नं संवत्या आयोग दुने दुपिं मनूतय्के नेपाल संवत्या आधिकारिक संवत्कथं छ्यलेगु खँय् छुं ज्या जुयाच्वंगु दु ला धका न्ह्यसः तल धाःसा मुलुकय् मेमेगु संवत्या नं अस्तित्व दुगु खँ न्ह्यथनाः नेपाल संवत्यात आधिकारिक मान्यता बीकेगु खँय् लिचिलाच्वंगु खनेदइ।
नेपाल संवत्या आन्दोलनयात गति बीगु निंतिं देय्या आदिवासी नेवाःत न्ह्यचिलाच्वंगु खँ सकसिनं सिउगु हे खः। आः नेपाल संवत्यात आधिकारिक मान्यता बीकेत दयेकूगु आयोगय् छम्ह जक नेवाः दुथ्याकाः मेमेपिं मेगु हे जातियापिं मनूत तयातःगु कारणं सरकारया नियती थ्व आयोगपाखें नेपाल संवत् सम्बन्धी जक ज्या कायेत दयेकूगु मखु धयागु अनुमान यायेछिं। नेपाल संवत्या आन्दोलनय् छुं नं कथंया सहभागिता मदुपिं, अध्ययन मदुपिंसं नेपाल संवत्यात आधिकारिक मान्यता बीगु निंतिं सकारात्मक पलाः न्ह्याकी धयागु आशा यायेगु नं पाय्छि जुइ मखु। थ्वहे कारणं आः नीस्वना तःगु संवत् सम्बन्धी कार्यदल मुक्कं नेपाल संवत्यात आधिकारिक मान्यता बीत मखु, नेपाल संवत्या आन्दोलन खँ मेमेगु संवत्नाप स्वानाः नेपाल संवत्या आन्दोलनयात मत्थर यायेगु कुतः जुइफइगु खँय् ध्यान वनेमाः।
नेपाल संवत्या आन्दोलनय् न्ह्यानाच्वंपिं आः सरकारपाखें आयोग दयेकूगु खँय् लसता प्वंकाच्वंगु खःसा थ्व विषय हाकनं छकः बिचाः यायेमाःगु स्थिति वःगु दु। आःया आन्दोलन धयागु नेपाल संवत्यात आधिकारिक कथं छ्यलाबुलाय् हयेगु खः। स्वीदँ न्ह्यवंनिसें नेपाल संवत्यात आधिकारिक मान्यता बीगु ज्याय् पूर्णता बीगु मान्यता खः।

More Stories Like this