लुम्बिनी विश्वविद्यालयया भवन अन्तिम चरणय्
येँ(सन्ध्या टाइम्स)/लुम्बिनी बौद्ध विश्वविद्यालयया ७ क्वःगु बुदिं म्हीग तःजिक हन।
प्रज्ञा भवन कमलादीइ जूगु उगु ज्याझ्वःया उलेज्या मूपाहां विश्व विद्यालय अनुदान आयोगया नायः डा. गणेशमान गुरुङ्गं यानादीगु खः। ज्याझ्वः उपकूलपति डा. त्रिरत्न मानन्धरया सभापतित्वय् न्ह्याःगु खः। ज्याझ्वलय् न्ववासें डा. मानन्धरं थौंकन्हय् विश्वविद्यालयया भवन निर्माणया ज्या न्ह्यानाच्वंगु व थ्व ज्या आः अन्तिम चरणय् थ्यनाच्वंगु खँ कनादिल। निर्माण सम्बन्धी ज्या क्वचायेवं हे पठनपाठन लगायत मेमेगु प्रशासनिक ज्याखँत लुम्बिनीं हे संचालन जुइगु खँ नं वय्कलं कनादिल।
ज्याझ्वलय् विशेष पाहां कथं उपाध्यक्ष आचार्य कर्मचण्ड, डा. नरेशमान बज्राचार्य डा. मिलन शाक्य, डा. रमेश ढुंगेलपिंसं नं थःथःगु नुगःखँ प्वंकादीगु खः।
लुम्बिनी विश्वविद्यालयय् ब्वंकीगु बौद्ध धर्म, दर्शन व संस्कृति सम्बन्धी खुगू विषय मध्ये स्वंगू विषय थौंकन्हय् लुम्बिनी विश्वविद्यालयपाखें सम्बन्ध प्राप्त यानातःगु थीथी शिक्षण संस्थातय्सं ब्वंकेगु यानाच्वंगु दु।
