धर्मोदय सभाया ६८ क्वःगु बुन्हि

येँ(सन्ध्या टाइम्स)/धर्मोदय सभाया ६८ क्वःगु बुदिंया लसताय् संघनायक भिक्षु अश्वघोष महास्थविर व धम्मानुशासक संघउपनायक भिक्षु कुमार काश्यप महास्थविरपिंत हनेगु ज्या जुल।
धर्मोदय सभाया नायः पं. बद्रिरत्न बज्राचार्यं वसपोल भन्तेपिंत खादा क्वखायेकाः हनापौ लःल्हानादीगु खः। वसपोल भन्तेपिं थेरवादी भिक्षु संघया संघनायक व संघउपनायक मनोनयन जुयाबिज्याःगु लसताय् धर्मोदय सभां वसपोलपिंत हंगु खः।
मूपाहां खेम्पो कालसोङ्ग लामां दिप प्रज्ज्वलन यासें नेपालय् बुद्ध शिक्षाया निंतिं बुद्ध धर्मया स्कूल स्थापना यायेमाःगु व उकिया सुरुवात धर्मोदय सभां हे यायेमाःगु खँ न्ह्यथनादिल।
ज्याझ्वलय् संघनायक भिक्षु अश्वघोषलिसें लुम्बिनी विश्वविद्यालयया उपकुलपति डा. त्रिरत्न मानन्धर, बखत बहादुर चित्रकार, लोकबहादुर शाक्य, सभासद् इन्द्रबहादुर गुरुङ्ग व गुरुमांपिंसं थःथःगु बिचाः प्वंकादीगु खः।
सभाया सभापति पं. बज्राचार्यं त्रिरत्न गमण याकाबिज्याःगु उगु ज्याझ्वलय् ब्वति काःपिं सकसिनं ६८ प्वाः मत नं च्याकूगु खः। सुचित्रमान शाक्यं लसकुस यानादीगु उगु ज्याझ्वलय् ग्वसाः खलःया उपाध्यक्ष सुवर्ण शाक्यं सुभाय् बियादीगु खः।