खुया यंकूगु खः/मखु

ख्वप(सन्ध्या टाइम्स)/थनया गोल्मढी त्वालय् च्वंगु छखा छेँय् खुया यंकल धकाः छगू थज्याःगु हल्ला जूगु दु गुकियात स्थानीय मनूत सुनां हे पत्याः मयाः। स्थानीय ज्ञानलाल गोसाइँया छेँय् म्हिगः न्हिनय् हे खुया यंकूगु जुयाच्वन। छेँया लिउनेपाखे स्वाहाने तयाः सुयागु पौ हे प्वाः ह्व हनाः दुहां वंपिं खुँतय्सं अन दराज स्यंकाः खुगूत्या तोला लुँया तिसा, ७५ द्वः दां व मेमेगु नं सामान खुया यंकूगु खः।
पीडित गोसाइँनं थःथाय् छेँय् खुया यंकूगु उगु घटनाय् अन हे त्वालय् च्वंपिं सीताराम साँय्जू व राजाराम साँय्जूया ल्हाः दु धासें प्रहरीइ किटानी जाहेरी तःगु दु। तर साँय्जूपिंसं धाःसा उकी थःपिनि ल्हाः मदुगु जक मखु थ्व खुया यंकल धाःगु घटना हे हल्ला जक खः धकाः द्वपं बिउगु दु। गोसाइँ च्वनाच्वंगु उगु छेँ हे थःपिनिगु खः धासें साँय्जूं उगु छेँ खाली या धकाः सर्वोच्च अदालतं तकं उजं बीधुंकूसां नं गोसाइँनं अटेरी जुयाः छेँ मत्वःतूगु व आः वयाः छेँ त्वःतेमाली धकाः हे थःपिंत अज्याःगु द्वपं बिउगु दावी याःगु दु।
थ्व निगू परिवारया दथुइ छेँया स्वामित्वयात कयाः ल्वापु दुगु जुयाच्वन।
गोसाइँनं धाःसा खुया यंकूपिं उपिं हे खः धासें थःथाय् छेँय् दुने दराज घाराघुरु यानाः स्यंका तःगु नं त्वाःबाःयापिं क्यंगु दु। घटनायात कयाः थौं सुथय् तक प्रहरीया छानबिन धाःसा मजूनि।