भट्टराईया उपयोगिता सिधल?
येँ(सन्ध्या टाइम्स)/डा. बाबुराम भट्टराई प्रधानमन्त्री जुइवं दिनाच्वंगु शान्ति प्रक्रिया नं न्ह्यात। सेना समायोजनया विवाद नं ज्यन। राज्य पुनर्संरचनाया विवाद नं समाधान जुइगु लँपुइ प्रवेश जुल। शायद आः वय्कःया उपयोगिता नं सिधल। उकिं हे जुइ, थौंकन्हय् माओवादी अध्यक्ष प्रचण्ड न्हूम्ह प्रधानमन्त्री मालेगु ज्याय् लगे जुयादीगु दु।
दिनाच्वंगु शान्ति प्रक्रियायात न्ह्यःने यंकेत भारतया ग्वाहालि मदयेकं मगाः। व ग्वाहालि कायेगु ज्या डा. भट्टराईनं जक याये फइ। थ्वहे खँयात थुइकाः प्रचण्डं भट्टराईयात प्रधानमन्त्री दयेकूगु खः। देशय् थ्व ज्या न्ह्यायेवं भट्टराईया उपयोगिता नं सिधःगु दुसा थुकिया नापनापं प्रचण्डं पार्टीया मेम्ह असन्तुष्ट नेता मोहन वैद्य पक्षलिसे थःगु स्वापू नं बढे याना हःगु दु।
सूत्रतय्सं धाः कथं थौंकन्हय् वैद्य व प्रचण्डया स्वापू न्हापा स्वयां ख्वातुया वःगु दु। आः छुं ई लिपा हे प्रचण्डं राष्ट्रिय सरकार गठनया निंतिं वैद्य पक्षया नेता रामबहादुर थापा (बादल) या नां प्रधानमन्त्रीया रुपय् प्रस्तावित यायेफुगु दावी सूत्रं याःगु दु। बादलयात वैद्य पक्षं समर्थन याइगु व भट्टराईनं नं विरोध याये मफइगु जूगुलिं थौंकन्हय् प्रचण्ड थ्वहे लाइन ज्वनाः न्ह्याः वनाच्वंगु खँ नं सूत्रं धाःगु दु।
