'नक्कली लडाकु दयेकाः राज्यकोष दुरुपयोग'

येँ(सन्ध्या टाइम्स)/नेपाली कांग्रेसया केन्द्रीय दुजः शेखर कोइरालां माओवादीं लडाकुया नामय् राज्यकोष दुरुपयोग याःगु द्वपं बिउगु दु। पाल्पाय् थौं सुथय् संचारकर्मीलिसे खँल्हासें वय्कलं माओवादीं फुक्कसित झंगः ल्हानाः संस्थागत भ्रष्टाचार याःगु द्वपं बियादीगु खः।
पार्टी ज्याझ्वलय् ब्वति काः वंम्ह नेता कोइरालां ६५०० स्वयां अप्वः लडाकु समायोजन याये हे फइ मखु धासें कनादिल, 'सम्झौता जुइधुंकूगु दु, समायोजन जुइ धुंकूपिनिगु ल्याः अप्वयेके फइ मखु।' वय्कलं आः वर्गीकरणय् समावेश मजूपिं स्वद्वःम्ह लडाकु नक्कली खः।' माओवादीं राज्य कोषपाखें आः तकया दुने १ अर्ब ५० करोड तका दुरुपयोग यायेधुंकूगु द्वपं नं वय्कलं बियादिल।
माओवादीं सेनाय् वनीपिं लडाकुया ल्याः अप्वयेकेमाली धकाः तःगु प्रस्तावयात कांग्रेसं अस्वीकार यायेधुंकूगु दुसा एमालेया महासचिव ईश्वर पोखरेलं नं समायोजनय् वनीपिं लडाकुया ल्याः अप्वयेके मजिउ धयादीगु दु। वय्कः प्रचण्ड लिसे शिविर निरीक्षणय् नं झाःम्ह खः।