जेठ ८ य् संविधान तयार याइगु

येँ(सन्ध्या टाइम्स)/संविधानसभाया विवाद समाधान उपसमितिं थ्वहे वइगु जेठ ८ गतेनिसें १४ गते तकया दुने संविधान जारी यायेगु कथं १३ बुँदाया कार्यतालिका प्रस्ताव याःगु दु। उगु प्रस्ताव संवैधानिक समितिइ पेस याये धुंकाः संविधानसभाय् छ्वइ। संसदं संविधानसभाया म्याद खुला थप याये धुंकाः संविधान निर्माणया नितिं उगु कार्यतालिका तयार याःगु खः।
संविधान निर्माणया नितिं राज्य पुनर्संरचना नाप स्वापू दुगु छगू बाहेक मेगु विवाद बारे पुस १५ गते तकया दुने सहमति यायेगु, उपसमितिं थ्वहे वइगु पुस १५ गते तकया दुने सहमति ब्वलंकेगु व उपसमितिं बिउगु प्रतिवेदनयात संवैधानिक समितिं पुस २० गते तकया दुने निर्णय याइगु जूगु दु।
अथे हे संवैधानिक समितिइ छुं नं विषययात कयाः सहमति ब्वलंके मफुत धाःसा उगु विषय संविधानसभाय् पेस यानाः पुस २० निसें २५ गते तकया दुने क्वःछीगु व राज्य पुनर्संरचना नाप स्वापू दुगु विषय बाहेक मेमेगु विषयया न्हापांगु मस्यौदा पुस २६ गतेनिसें माघ १५ गते तकया दुने तयार यायेगु कार्यतालिकात दयेकूगु दु।
अथे हे निलाया निंतिं दयेकूगु राज्य पुनर्संरचना आयोगं सरकारयात पेस याइगु प्रतिवेदनयात माघ १५ गते तकया दुने संविधासभाय् पेस यायेगु आयोगया सुझाव नापंया आधारय् संविधानसभाया राज्य पुनर्संरचना समितिया प्रतिवेदनयात माघ मसान्तया दुने अन्तिम रुप बीगु कथं राजनीतिक दलतय्सं संविधान च्वयेगु कार्यतालिका तयार याःगु दु।
उकथं हे संवैधानिक समितिं राज्य पुनर्संरचना नाप स्वापू दुगु विषयत नं दुथ्याकाः संविधानया न्हापांगु मस्यौदा फागुन १ गतेनिसें १५ गते तकया दुने तयार यायेगु, फागुन २२ गते दुने न्हापांगु मस्यौदयात संविधानसभाय् सैद्धान्तिक छलफल यानाः पारित यायेगु व राजपत्रय् पिथनेगु कार्यतालिका दयेकूगु दु। न्हापांगु मस्यौदाबारे संविधानसभा, जनमत संकलन व समन्वय समितिं आम जनताया राय सुझावया निंतिं फागुन २३ गतेनिसें चैत्र १५ गते तक प्रचार प्रसार यायेगु व सुझाव ग्रहण यायेगु कार्यतालिका दयेकूगु दु।
जनमत संकलन व समन्वय समितिं उगु अवधिया दुने जनताया राय सुझाव सम्बन्धी प्रतिवेदन तयार यानाः संविधानसभाय् पेस यायेगु, सभां प्रतिवेदनयात कयाः छलफल यायेगु व संवैधानिक समितियात मस्यौदा परिमार्जन यानाः चैत्र १६ गतेनिसें चैत्र मसान्ततकया दुने संविधानसभां निर्देशन बीगु कार्यतालिका तयार याःगु दु। संविधानसभाया निर्देशन कथं संवैधानिक समितिं न्हापांगु मस्यौदा परिमार्जन यानाः संविधानसभाया विधेयक तयार यानाः सभाय् वइगु २०६९ बैशाख १ गतेनिसें ७ गते तक पेस याइगु जूगु दु। अथे हे संविधानया विधेयक सदस्यतय्त इना बीगु, सदस्यतय्सं थःथःपिंसं संशोधन पेस यायेगु, सभाय् संशोधनया धारागत छलफल यानाः प्रस्तावना नापं प्रत्येक धारा पारित यायेगु ई बैशाख ८ गतेनिसें जेठ ७ गते तक धाःगु दु। वइगु जेठ ८ गतेनिसें १४ गते तकया दुने पारित संविधानय् फुक्क सदस्यतय्गु ल्हाःचिं तयेगु, अध्यक्षं प्रमाणित यायेगु व राष्ट्रपतिसमक्ष पेस यानाः संविधान जारी यायेगु कार्यतालिका दयेकूगु दु। कांग्रेस नेता विमलेन्द्र निधिं उपसमितिपाखें तयार याःगु कार्यतालिका थ्वहे मंसिर १८ गते च्वनीगु संवैधानिक समितिइ पेस जुइगु व समितिं अनुमोदन यानाः संविधानसभाय् छ्वइ धयादीगु दु।
कार्यतालिका तयार यायेत थौं च्वंगु बैठकय् उपसमितिया संयोजक लिसें माओवादी अध्यक्ष प्रचण्ड, प्रधानमन्त्री डा. बाबुराम भट्टराई, संविधानसभाया अध्यक्ष सुभाष नेम्वाङ, संवैधानिक समितिया सभापति नीलाम्बर आचार्य, उपसमिति दुजःत व च्याम्ह आमन्त्रित दुजःतय् उपस्थिति दुगु खः।