म्यानमारय् नाकाबन्दी चीकेत चीनया इनाप

चीनं म्यानमारयात तयातःगु नाकाबन्दी चीकेगुपाखे कुतः यायेत विश्व समुदायनाप इनाप याःगु दु । चीनया विदेश मन्त्रालयं ताः ईनिसें हे म्यानमारय् तयातःगु नाकाबन्दी चीकेगु निंतिं विश्व समुदाययात बिहीवाः इनाप याःगु खः । थःगु छगू साझेदार देय्या रुपय् दुगु म्यानमारयात विश्व समुदायया गुलिखय् राष्ट्रतय्सं सैनिक सरकारया रुपय् नाकाबन्दी तयाः वयाच्वंगुलिं उगु विषयलय् पुनर्विचार यायेत चीनं इनाप याःगु खः ।

बुधवाःनिसें अमेरिकया विदेश मन्त्री हिलारी क्लिन्टनं म्यानमारया औपचारिक भ्रमण न्ह्याकूगु झ्वलय् हे चीनं थ्व इनाप याःगु खः । करिब न्यागू दशक न्ह्यः सुरू जूगु अमेरिका व म्यानमार दथुइया कुटनीतिक स्वापु लिपा न्हापांगु खुसिइ म्यानमारया भ्रमणया निंतिं अमेरिकया विदेश मन्त्री हिलारी क्लिन्टन म्यानमार थ्यंकादीगु खः ।

'जिमिसं फुक्क राष्ट्रतय्त म्यानमारय् तयातःगु आर्थिक नाकाबन्दी चीकेगु प्रक्रियाया थालनी यायेगु निंतिं इनाप यानाच्वना' - चीनया विदेश मन्त्रालयया प्रवक्ता होङ लिं बिहीवाः पिथनादीगु विज्ञप्तीइ न्ह्यथनातःगु दु । छुं महिना थुखेनिसें म्यानमारया सरकारं राजनीतिक सुधारया नामय् छुं सुधारया ज्याझ्वःयात न्ह्याकेधुंकाः अमेरिकां नं उकिया लसकुस कथं स्वापू सुदृढीकरणया ज्या न्ह्याकूगु खः ।

म्यानमारया सैनिक ग्वाहालिया सरकारं प्रजातन्त्रवादी नेतृ आङ साङ सुकीयात तसकं ताःहाकःगु इलंनिसें नजरबन्दय् तयेगुया लिसलिसे प्रजातान्त्रिक ज्यायात नं प्रतिबन्द तःगुलिं उगु देय् दथुइ विश्वया गुलिखय् राष्ट्रं नाकाबन्दी तःगु खः । तर क्लिन्टनया भ्रमणया कारण म्यानमारय् न्ह्यानाच्वंगु मानव अधिकारया ल्वापुया पुनरावलोकन जुइगु व प्रजातान्त्रिक ज्याय् नं तिबः जुइफुगु अपेक्षा विश्व जगतं याःगु दु ।

More Stories Like this