नेता प्रधान जुया वनाच्वंगु राजनीति दलत

श्रीकृष्ण महर्जन

थुगुसी संविधानसभाया म्याद फुइत्यंगु अले संविधानसभाया म्याद थप याःगु यात नं नेपाःमि जनतां खास हे चिउताः तःगु खने मंत। संविधानसभाया म्याद न्हापांखुसी फुइत्यंगु इलय् गुकथं नेपाःमितय्सं सरोकार क्यंगु अले त्वाःत्वालय् जक मखु दुवाःदुवातय् तकं छगू कथं बहस जूगु खःसा थुगुसी उज्वःगु छुं हे अवस्था खने मंत। नेपाःमि जनतां थःपिंसं हे भोट बियाः संविधान निर्माणया नितिं त्याका छ्वयापिं संविधासभाया सभासद्तय्गु ई फुइत्यंगुयात अथे सरोकार मक्यंगु धइगु नेपाःया राजनीति व दलया नेतातप्रति तकं झन झन वेवास्ता याना वनाच्वंगु खः धायेफु। वंगु मंगलवाः जक संविधानसभाया म्याद हाकनं खुला थप यायेगु ज्या व्यवस्थापिका संसदं याःगु दु। प्रमुख दलया नेतातय्गु सहमति कथं संविधानसभाया म्याद हाकनं थप याःगु खःसा थुगुसी अथे म्याद थप याःगु खः। संविधानसभाया म्याद थप जूगुयात संचार माध्यमं बय्बय् याःसां नं नेपाःमि जनतां खास हे चिउताः मतःगु धइगु गनं राजनीति व दलया नेतात खनाः जनता निराश जूगु जकं मखु ला धकाः न्ह्यसः ब्वलनीगु स्वाभाविक हे खः ।

देय्या राजनीतिप्रति हे जनतां माःगु कथं सरोकार मक्यंगुया मू कारण धइगु नेतातय्सं छु यायेमाः या हे याइ झीत छु सरोकार धकाः बेवास्ता याःगुलिं खः। सर्वसाधारण नागरिकतय्सं जक मखु राजनीतिक दलया कार्यकर्तातय्सं तकं संविधानसभाया म्याद फुइत्यंगु व हाकनं थप याःगुयात वास्तवय् माःकथं चिउताः तःगु खने मंत। थ्व ल्याखं स्वयेबलय् राजनीतिक दलया कार्यकर्तात तकं नेतात खनाः निराश जूगु खनेदु। आखिर जनतांनिसें
राजनीतिक दलया कार्यकर्तात तकं अथे निराश जूगु, मूल राजनीतिक विषयय् सरोकार क्यनेत तकं तयार मजूगु कारण धइगु दल व नेतात खः धकाः धाये फइगु अवस्था दु। नेपाःया जनतां गुकथं संविधानसभाया चुनाव लिपा जनताया निंतिं नेतातय्सं ज्या याइ धकाः तायेकूगु खः अथे नेतातय्सं ज्या मयाःगुलिं हे खः ।

नेपाःया प्रमुख राजनीतिक दलया नेतातय्सं न्ह्यःने लाःगु इलय् न्ह्यःने लाःथे न्ववाना जूगु नापं पिनें स्वयेबलय् मिले हे मजूपिं थें जुइगु व अन्तिम इलय् सहमतिया नामय् मिले जुइगु घटना लागातार जुयाच्वंगुलिं हे जनतां अथे नेतातप्रति विश्वास मयानाहःगु खः ।

उलि जक मखु प्रमुख राजनीतिक दलया कार्यकर्तांनिसें केन्द्रीय नेतातय्सं तकं देय्या राजनीति गुखेपाखे वनीगु अले नेतातय्सं गबलय् सहमतिया नामय् छु याइगु खः धकाः धाये मफुगु अवस्था वयाच्वंगुलिं नं झन हे जनता निराश जूगु खः। विशेष यानाः शीर्ष नेतातय्सं बाहेक मेपिं नेतात धाइपिं जनता लिसे प्रत्यक्ष रुपं सरोकार क्यनीपिं नापं जनतायाथाय् वनीपिं खः। अथे जनता नापं कार्यकर्तातय्थाय् वनीगु इलय् तकं देय्या राजनीति नापं पार्टीं थथे याइगु जुल धकाः धाये मफया वनाच्वंगु दु। उकिया हे लिच्वः कथं जनतां राजनीतिइ झन झन सरोकार क्यना महयाच्वंगु धाःसां छुं पाइ मखु ।

प्रमुख राजनीतिक दलया नेतातय्सं हे नं शीर्ष नेतातय्गु जक खँ न्यनेगु बाहेक मेगु छुं हे धाये फयाच्वंगु मदु। अथे जूगुया मूल कारण धइगु पार्टी दुने वास्तवय् माःगु कथं बहस हे मजूगुलिं खः। छुं नं पार्टी दुने मंकाः कथं बहस यानाः निर्णय यायेगु प्रक्रियायात नेतातय्सं झन बेवास्ता याना वनाच्वंगु दु। दलया बैठक हे जुल धाःसां नं खास हे निर्णय मयाइगु अले शीर्ष नेतातय्त निर्णय यायेगु भाला बीगु ज्या लगातार रुपं जुया वयाच्वंगु दु। चाहे व संविधानसभाया दकलय् तःधंगु दल माओवादी हे छाय् मजुइमा चाहे कांग्रेस एमाले हे छाय् मजुइमा। अथे फुक्क प्रमुख दल दुने केन्द्रीय स्तरया बैठक जूसां बैठकं खास हे निर्णय मयाइगु अले मेमेगु दललिसे सहलह यानाः शीर्ष नेतातय्सं निर्णय यायेगु धकाः म्याण्डेट बीगु यानाच्वंगु दु।
उलि जक मखु प्रमुख राजनीतिक दलया केन्द्रीय कमिटीया बैठक तकं गृहकार्य मगाःनि धकाः लिलिछ्याना वनाच्वंगु दु। एकीकृत माओवादीया ला तःक्वःमछि हे केन्द्रीय बैठक गृहकार्य मगाःगु धकाः लिछ्यायेगु ज्या तकं जुल। अले कांग्रेसया नं केन्द्रीय बैठक तकं लगातार स्थगित याये मालाच्वंगु दु। उगु हे कथं एमालेया केन्द्रीय कमिटीया बैठक जूसां अन्ततः मेमेगु दलया शीर्ष नेतातलिसे वार्ता यानाः निष्कर्षय् वने धाइगु। झन मधेसी मोर्चाया ला बैठक हे जुयाच्वंगु मदु ।

गबलें गबलें ला केन्द्रीय कमिटीया निर्णय छगू अले शीर्ष नेतातय्गु वार्तां उकियात बेवास्ता यानाः न्हूगु हे कथं सहमति यायेगु यानाच्वंगु घटना नं मजूगु मखु। उकिं हे जुइ सायद दलया केन्द्रीय स्तरया नेतात तकं निराश जुयाच्वंगु दु ।

फुक्क धइथें पार्टी दुनेया शीर्ष नेतातय्सं छु चाहना यात अथे हे जुइगु वातावरण नेपाःया राजनीतिइ ब्वलना वनाच्वंगु दु। प्रमुख दलया शीर्ष नेतातय्गु बैठकं छु जुइगु वहे कथं न्ह्याः वनाच्वंगु दु। उकिं यानाः दलतय्गु थःथःगु बैठकया अस्तित्व झन झन हे मदया वनाच्वंगु दु। पार्टी कमिटी प्रणाली हे मदया वनाच्वंगु जकं मखुला धकाः न्ह्यसः ब्वलना वःगु दु। पार्टी दुने कमिटी प्रणाली मंत धाःसा उकिया अर्थ धइगु नेता प्रणाली खः। नेता प्रणाली धइगु पार्टी नेता प्रधान खः। नेता प्रधान जुल धाःसा पार्टीया कार्यकर्ता व सर्वसाधारण मनूत नेतातय्गु जक भरय् च्वने मालीगु अवस्था वइगु। उकिं आःया राजनीति स्वल धाःसा अवश्य नं पार्टीत कमिटी प्रणालीयात त्वःताः नेता प्रधान जुया वनाच्वन धकाः धाये फइगु अवस्था वइ। उकिं नेपाःया राजनीति आःया अवस्थाय् नेता प्रधान जुया वनाच्वंगु दु। चाहे व सहमतिया नामय् जुइमा, चाहे शान्ति व संविधानया नामय् जुइमाः। अथे नेता प्रधान जुयाः दलत न्ह्याः वन धाःसा उकिं यानाः जनता निराश यायेगु अले स्वयं कार्यकर्तातय्त तकं विस्थापित यायेगु ज्या जुइ मखु धाये फइगु अवस्था मदु। कन्हय् वनाः माओवादीप्रति मखु प्रचण्डप्रति, कांग्रेसप्रति मखु सुशील कोइरालाप्रति, एमालेप्रति मखु झलनाथ खनालप्रति, मधेसी मोर्चाप्रति मखु जेपी गुप्ताप्रति कार्यकर्तात इमान्दार जुइ। उकिं यानाः गुटबन्दी जुइ। पार्टीया कार्यकर्तात तकं नेतामुखी जुया वनी। गुकिं यानाः कार्यकर्तांनिसें सर्वसाधारण मनूत तकं झन झन पार्टीप्रति इमान्दार मजुसे नेतामुखी जुयावनीगु अवस्था वइ। उकिं आः गनं नेपाःया राजनीति उगु हे लँपुइ जकं वनाच्वंगु मखुला धइगु न्ह्यसः वःगु दु। थुगु खँय् शीर्ष नेतानिसें केन्द्रीय स्तरया नेतातय्सं नं बिचाः यायेमाःगु ई वःगु दु ।

More Stories Like this