अशक्त लडाकुया लागिं गज्याःगु प्याकेज?
माओवादी लडाकुतय् पुनर्वर्गीकरणया ज्या न्ह्याकु न्ह्याकुं हे अपांग, घाःपाः जूपिं व उमेर वनेधुंकूपिं लडाकुतय् बारे माओवादी व सरकार निगुलिं निकायं छुं हे विशेष ज्याझ्वः महः धकाः लडाकुतय्सं आन्दोलनया ख्याच्वः बिया हःगु दु। खतुं थ्व ख्याच्वःयात पार्टी व सरकारं गम्भीर रुपं काःगु दु धइगु खँ सरकार प्रमुख व पार्टी प्रमुख निम्हं नेतातय्सं तुरुन्त हे शिविर भ्रमण यानाः असन्तुष्ट लडाकुतय्त नापलानाः वय्कःपिनि समस्या समाधान यायेगु जुइ धकाः बचं बिउगुलिं नं सीदत। अथे खःसां घाःपाः जूपिं, अपांग जूपिं लडाकुतय्सं पार्टी व थःगु हे पार्टीं नेतृत्व यानाच्वंगु सरकारया ध्यान सालेगु लागिं नं थथे आन्दोलनया ख्याच्वः बीमाःगु धाःसा बांलाःगु खँ मखु। लडाकुतय्सं छुं धाये न्ह्यः हे वास्तवय् उमिगु हकय् राज्यं छु याये त्यना धकाः सार्वजनिक यायेमाःगु खः। थ्व लडाकुत अपांग वा घाःपाः जूगु खःसा जनताया लागिं ल्वांल्वां हे जूगु खः। जन आन्दोलनय् घाःपाः जूपिंत राज्यं विशेष व्यवस्था यायेगु खःसा जनयुद्धय् घाःपाः जूपिंत नं यायेमाः धकाः सः पिहां वइगु स्वाभाविक खः। युद्ध सिधयेधुंकाः उकिया नेतातय्स थुज्वःपिं असक्त योद्धातय्त ल्वःमंकेगु ज्या याये मजिउ। धायेत ला सरकारं उज्वःपिं लडाकुतय् लागिं विशेष प्याकेज हे हयेगु धकाः आश्वासन बिउगु दु। तर उज्वःगु प्याकेज सार्वजनिक याये न्ह्यः उकी सम्बद्ध लडाकुत सहमत दुगु खः लाकि मखु धकाः न्ह्यव हे बुझे यायेगु ज्या जुइमाः। घोषणा जूगु प्याकेज प्रयाप्त मजू धकाः लडाकुतय्सं अस्वीकार यात धाःसा व बांलाःगु ज्या जुइ मखु। थुकी माओवादी व सरकार निगुलिं निकाय गम्भीर जुइमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
