ख्वपय् नीस्वंगु लुमन्ति भवन

कृष्ण प्रजापति

मेसीन व भवन मदयेकं सुविधापूर्वक क्यान्सर ल्वगितय्गु उपचार सम्भव मजुइगु जुयाः थ्व योजनाय् ज्या जूगु खः।
भक्तपुर क्यान्सर अस्पतालं आः नकतिनि हे जक ख्वपय् लुमन्ति भवन कथं करोडौं तुकाः दयेकेत्यंगु भवनया जग स्वनेज्या जुल। नेमकिपाया अध्यक्ष नारायणमान बिजुक्छेँ रोहितं जग स्वनादीगु खः। ख्वपयात क्यान्सर उपचारया केन्द्र हे दयेकेगु झ्वलय् उगु लुमन्ति भवन दयेकेत्यंगु खः। उकिया लागिं देश विदेशय् च्वंपिं मनूतय्के म्हतिं छगू लाख दां म्हयेगु यानाच्वंगु दु। डा. विवेक प्रधानाङ्गया कथं खुदँ न्ह्यः हे उगु भवन निर्माणया ताः तयाः थीथी गतिविधि शुरु जूगु खः। तर व ज्या न्ह्यःने धाःसा वने मफुत ।

डा. प्रधानाङ्ग विदेशय् च्वनाः ज्या यायेगु झ्वलय् थःत वःगु पैतृक सम्पत्ति छु याःसा जी धकाः तिरिमय्जुलिसे सल्लाह यानाःलि थ्व योजना पिहां वःगु खँ वय्कलं कनादिल। थःपिंसं मां अबुपिनि नामय् छुं याना क्यनेगु सोच यायेधुंकाः आः तक वय्कःपिं तनमनधन बियाः हे लगे जुयाच्वनादीगु दु। उकिं हे थौं ख्वपया क्यान्सर अस्पतालय् न्हूगु कथंया सुविधासम्पन्न लुमन्ति भवन तयार जुइत्यंगु खः ।

चान्हय् द्यंसां न्हिनय् ज्याय् वंसां कलाः व विवेकं थज्याःगु हे सोचयात सार्थक यायेगुली ध्यान तयादिल। लिच्वः न्यादँ खुदँ लिपा जूसां थ्व ज्या प्रारम्भ जूगु दु। बेलायत व अमेरिकाय् च्वनीपिं नेपाःमितय्सं म्हतिं छगू छगू लाखया ल्याखं अस्पताल दुने तयार याइगु उगु भवन दनेत आर्थिक ग्वाहालि यानाच्वंगु दु। डाइलाय्सिस मेसीन न्यायेगु सोच सार्थक यानाः उकियात थःपिनि लुमन्ति भवन दुने तयेगु सोच उमिसं न्हापां तयार याःगु खः। मेसीन व भवन मदयेकं सुविधापूर्वक क्यान्सर ल्वगितय्गु उपचार सम्भव मजुइगु जुयाः थ्व योजनाय् ज्या जूगु खः। निगू करोड खर्च वनीगु कथं तयार यायेत्यंगु उगु भवनया असोज ३० गते जग स्वंगु खः ।

गोपाल कक्षपतिया अध्यक्षताय् स्थानीय निर्माण समिति नीस्वंगु नं आः न्यादँ पूवने धुंकल। उकिया नाप नापं आः तक थुगु समितिं ६६ लाख तका दां मुंकेधुंकूगु दु। आः नं जःलाखःला व थःथितिपिंपाखें थुगु अभियानया प्रचार यानाः थप ४०/५० लाख तका दां मुंकेगु तयारी जुयाच्वंगु दु। पीदँ न्ह्यवंनिसें हे क्यान्सर विषयय् अध्ययन अनुसन्धान यानाच्वनादीम्ह डा. अन्जली कुमार शर्मां नं थःथिति व थः काय् भौपिनि नामय् दां फ्याना उत्साहित यायेवं मेमेपिंत नं छगू छगू लाख दां अन तयेत प्रेरित याःगु दु। अन्तर्राष्ट्रिय गरीबी उन्मुलन दिवस लाकाः थथे छगू छगू लाख दान कायेगु अभियान न्ह्याकूगु खः ।

तसकं उत्साहं ज्या जुयाच्वंगुलिं लुमन्ति भवन याकनं पूवनीगु विश्वास ख्वपया पुलांम्ह सभासद् लेखनाथ न्यौपाने व नेमकिपा अध्यक्ष नारायणमान बिजुक्छेँ कयादीगु दु। वय्कःपिसं थुगु विकास निर्माणया ज्याय् सुनानं राजनीतिक अवरोध खडा याये मजिउगु व थःपिनि पार्टीपाखें छुं नं कथंया राजनीतिक अवरोध खडा मयायेगु नं प्रतिवद्धता प्वंकादीगु दु ।

More Stories Like this