स्वरोजगार ज्याकुथी तोडफोड
ज्वंपिं त्वःतकेत त्रिचन्द्र व आरआर न्ह्यःने प्रदर्शन
येँ (सन्ध्या टाइम्स)/एमाले समर्थित युवा संघया कार्यकर्तातय्सं थौं अनामनगरया युवा स्वरोजगार कोषया ज्याकू तोडफोड याःगु दु। तोडफोड याःपिं संघया ३५ म्ह कार्यकर्तातय्त प्रहरीं ज्वंगु दु। इमिसं कोषया ज्याकुथी झ्याःया न्हाय्कं व फर्निचर तोडफोड याःगु खः। ज्वंपिं मध्ये युवा संघया अध्यक्ष महेश बस्नेत, महासचिव निर आचार्य नं लाःगु खः ।
अन एमालेया युव संघया कार्यकर्ता व प्रहरीया दथुइ छुं ई तक झडप तकं जूगु खः। झडपय् लानाः निम्ह प्रहरी नापं युवा संघया छुं छुं कार्यकर्तात घाःपाः तकं जूगु दु। कोषया न्हू नियुक्त जूम्ह उपाध्यक्ष डा. पुण्य रेग्मीं छुं दिं न्ह्यः एमाले नेता सुरेन्द्र पाण्डेया कलाःया गाडी चालकयात लित सःतूगु विषयय् विवाद जूगु खः। पाण्डें थः अर्थमन्त्री जूगु इलय् कोषया चालकयात कोषपाखें हे तलब बीगु कथं कलाःया निंतिं निजी चालक तःगु खः ।
युवा संघ कार्यकर्तातय्सं धाःसा युवा स्वरोजगार कोषया ध्यबा दुरुपयोग दिकेमाःगु माग यासें कोषया ज्याकुथी तालं ग्वयेत्यंगु इलय् प्रहरीं हस्तक्षेप याःगु दु। कोषया ध्यबा माओवादी कार्यकर्तात लहीगु नितिं दुरुपयोग यात धकाः युवा संघं विरोध याना वयाच्वंगु खः ।
ज्वंपिं सकसितं महेन्द्र पुलिस क्लबय् तयातःगु दु। उखे युवा संघया कार्यकर्तातय्सं ज्वंपिं थः नेतातय्त त्वःतेमाः धासें त्रिचन्द्र व आरआर क्याम्पसया न्ह्यःने प्रदर्शन याःगु दुसा अन प्रहरीलिसे अप्पां कयेकाः नं ल्वापु जूगु दु ।
