लडाकु थपे यायेगु प्रस्ताव कांग्रेसपाखें अस्वीकार
येँ (सन्ध्या टाइम्स)/प्रमुख प्रतिपक्षी दल नेपाली कांग्रेसं समायोजनय् वनीपिं लडाकुतय्तगु ल्याः ६५०० पाखें बढे यानाः ९,००० थ्यंकेत माओवादीं याःगु इनापयात अस्वीकार याःगु दु। थौं सुथय् च्वंगु कांग्रेसया केन्द्रीय पदाधिकारीतय् बैठकं माओवादीया उगु प्रस्तावयात अस्वीकार याःगु खः ।
माओवादीं आः म्होति नं ९,००० म्ह लडाकुतय्त सेनाय् समायोजन यायेमाली धइगु प्रस्ताव तःगु खःसाव उकियात हे लिसः बी कथं कांग्रेसं थःपिनि धारणा स्पष्ट याःगु खः। ७ बुँदाया सहमतिइ ६५०० जक लडाकु समायोजन यायेगु धकाः उल्लेख यानातःगु खःसां लडाकुया पुनवर्गीकरण जूबलय् समायोजनाय् वनीपिं अप्वः दयेवं माओवादीं न्हापा क्वःछिउगु भचा अप्वयेके माली धकाः प्रस्ताव तःगु खः। कांग्रेसयात थ्व इनाप यायेत प्रधानमन्त्री बाबुराम भट्टराई थौं सुथय् कांग्रेस सभापति सुशील
कोइरालाया छेँय् वंगु खः ।
थौं च्वंगु केन्द्रीय पदाधिकारीया बैठकं राज्य पुनर्संरचना आयोगय् थःपिनिगु धारणा स्पष्ट यायेगु नितिं केन्द्रीय दुजः नरहरि आचार्यया संयोजकत्वय् स्वम्हेसिया छगू समिति नं दयेकूगु दु। उकथं हे कांग्रेसया थीथी भातृ संगठन विघटन लिपा सुरु जूगु विवादयात कयाः नं सहमति यायेगु निंतिं सहलह जूगु खँ नं धाःगु दु ।
