यल मंकाः खलःया बुन्हि
यल (सन्ध्या टाइम्स)/नेपालभाषा मंकाः खलः यलया ३३ क्वःगु बुदिं म्हिगः छगू ज्याझ्वः यासें हन। थौं सिबें ३३ दँ न्ह्यः ने.सं. ११०० थिंलाथ्व षष्ठि कुन्हु नीस्वंगु मंकाः खलः यलया बुदिं खलःया नायः किरण शाक्यया सभापतित्वय् खलःया थःगु हे छेँय् जूगु खः। ज्याझ्वःया उलेज्या मंकाः खलः यलया संस्थापक, पुलांम्ह नायः लिसें वर्तमान सल्लाहकार डा. पुष्पराज राजकर्णिकारं सुकुन्दाय् मत च्याकाः यानादीगु खः ।
ज्याझ्वलय् सल्लाहकार भाजुपिं डा. राजकर्णिकार, कृष्णलाल महर्जन व शाक्य सुरेनपिंसं मंकाः खलःया स्थापना कालया खँ व मंकाः खलकं यायेमाःगु ज्याखँया बारे नुगःखँ प्वंकादीगु खः ।
यलया त्यागलय् थःगु हे दबूछेँ व ज्याकू दुगु यल मंकाः खलः नियमित रुपं न्हूधाः यासें इलय् ब्यलय् साहित्यिक गोष्ठी, नेवाः स्वायत्त राज्य बारे बिचार गोष्ठी आदि थेंज्याःगु ज्याझ्वः नं याना वयाच्वंगु दु ।
