एसएमएस यानाः बैठक स्थगित
येँ (सन्ध्या टाइम्स)/एकीकृत माओवादीया लगतातर स्थागित जुयाः वयाच्वंगु केन्द्रीय समितिया बैठक थौं नं स्थगित जूगु दु। थौंया बैठक स्थगित यानागु जुल धकाः केन्द्रीय दुजःतय्गु मोबाइलय् एसएमएस छ्वयाः हःगु खः। माओवादीया केन्द्रीया कार्यालय पेरिस डाँडाया कुसल नांम्ह नेतां फुक्क हे केन्द्रीय नेतातय्त छ्वःगु खः ।
उगु एसएमएसय् धाःसा वइगु पुष ८ गते केन्द्रीय समितिया बैठक च्वनेगु धकाः नं न्ह्यथानातःगु दु। माओवादीया केन्द्रीय समितिया बैठक संभवतः अथे एसएमएस छ्वयाः बैठक स्थगित जूगु जानकारी बिउगु थ्व हे न्हापांखुसि खः। माओवादी दुने लाइन संघर्ष तच्वया वनाच्वंगु नापं ता ई न्ह्यःनिसें बरिष्ठ उपाध्यक्ष मोहन बैद्य किरण पक्षधरं पार्टीया अध्यक्ष प्रचण्ड व उपाध्यक्ष नापं प्रधानमन्त्री डा. बाबुराम भट्टराई नं यानाः वयाच्वंगु ज्या, मेमेगु दलतलिसे यानाच्वंगु सहमतियात कयाः आपत्ति प्वंकाः फरक मत तकं तयाः वयाच्वंगु खः। तःक्वःमछि हे केन्द्रीय समितिया बैठक स्थागित जुयाच्वंगुलिं कार्यकर्तातय्त तकं लिच्वः लानाच्वंगु दु ।
