भिक्षु सोभितया स्वीदँय् क्यंगु प्रव्रज्या जीवन

येँ (सन्ध्या टाइम्स)/ गण महाविहारया प्रमुख भिक्षु सोभित महास्थविर प्रव्रज्या जुयाबिज्याःगु स्वीदँय् क्यंगु लसताय् स्वीक्वःगु प्रव्रज्या दिवस नापं सम्मान व अभिनन्दन ज्याझ्वः जुल। ज्याझ्वलय् मूपाहां कथं बिज्याःम्ह संघनायक भिक्षु अश्वघोष महास्थविरं भन्तेपिनिगु थुकथं मूल्यांकन जूगु छगू बांलाःगु पक्ष खः धासें नेपालय् अप्वयाच्वंगु देखासिखी प्रवृत्तियात कुंखिनाबिज्यात ।

ज्याझ्वलय् थेरवादी बुद्ध धर्म प्रचार प्रसार व उत्थान यायेगु ज्याय् विशेष योगदान यानाबिज्याःम्ह भिक्षु शीलभद्र महास्थविर व अनागारिका सत्यशीला गुरुमांपिंत हनापौ लःल्हासें अभिनन्दन याःगु खः। भन्ते सोभित महास्थविरं थः नापं भन्ते जुयाबिज्याःपिं श्रद्धेय भद्दित भन्ते, श्रद्धेय उपतिस्स भन्ते, श्रद्धेय कोलित भन्ते, श्रद्धेय राहुल भन्ते व श्रद्धेय सदातिस्स भन्तेपिंत खादा क्वखायेकाः हनाबिज्याःगु खः ।

अथे हे वसपोल भन्तें बुद्ध धर्म नापं विहारया उत्थानया निंतिं उल्लेखनीय योगदान याःपिं उपासक उपासिकापिं मय्जु लक्ष्मीप्रभा कंसाकार, लक्ष्मीशोभा स्थापित, भाजु द्रव्यमान सिंह तुलाधर, मोतिलाल शिल्पकार, पञ्चवीर सिंह तुलाधर व धर्महेरा ताम्राकारपिंत दोसल्लां न्ययेकाः हनापौ लःल्हानाबिज्याःगु खः। अथे हे ७० दँ पुलेधुंकूपिं ज्याथजिथिपिं स्वीम्ह उपासक उपासिकापिंत पलेगां न्ययेकाः हनेगु ज्या खः। मूपाहां अश्वघोष भन्तें शील प्रार्थना यानाः न्ह्याकाबिज्याःगु उगु ज्याझ्वलय् मैत्रीय महास्थवीर व उपसंघनायक कुमार काश्यप महास्थवीरपिंसं थःगु नुगः खँ प्वंकाबिज्याःगु खः ।

मय्जु इन्द्रकुमारी महर्जनं लसकुस यानादीगु उगु ज्याझ्वलय् सोभित भन्तें सुभाय् न्वचु बियाबिज्याःगु खः। ज्याझ्वलय् संघनायक, उपसंघनायक व मैत्रीय भन्तेपिंसं दीप प्रज्ज्वलन नं यानाबिज्याःगु खः ।