प्रचण्ड व प्रमयात लडाकुतय्गु अल्टिमेटम

येँ (झीगु स्वनिगः)

रोल्पाया दलहवन लागाय् च्वंगु माओवादी लडाकुतय्गु शिविरय् वंपिं एकीकृत नेकपा -माओवादी)या नायः पुष्पकमल दाहाल प्रचण्ड व प्रधानमन्त्री नापं माओवादीया न्वकु डा. बाबुराम भट्टराईयात छवाःया अल्टिमेटम ब्यूगु दु । ९ बुँदाया माग तयाः आन्दोलन घोषणा याःपिं लडाकुतय्त हयेकाः आन्दोलन दिकेत वंपिं नेतातय्त म्हिगः बुधवाः लडाकुतय्सं उगु कथं नेतातय्त लल्टिमेटम ब्यूगु खः । थःपिनिगु मागयात पूरा यायेगु नितिं अन्तिम अल्टिमेटम कथं मंसीर २१ गते तकया ई बियागु दु धकाः घाइते तथा अपांग योद्धा संघर्ष समितिया दुजः राजेन्द्र रावतं संचारकर्मीतय्त जानकारी बियादीगु खः । अबले प्रधानमन्त्री भट्टराई नं घाःपाः जूपिं व अपांग लडाकुतय्गु नितिं विशेष प्याकेज हयेगु आश्वासन बियादीगु खः ।

विशेष राहतया प्याकेज हयेगु धकाः आश्वासन ब्यूगुलिं लडाकुतय्सं आः मंसीर २१ गते तक पिइगु जूगु दु । स्वंगू प्रमुख दल व मधेसी मोर्चाया शीर्ष नेतातय्गु दथुइ ७ बुँदाया सहमति याःगु इलय् घाःपाः जूपिं लडाकु व अपांगतय्गु भावनायात कदर मयाःगु धकाः थीथी कथंया ९ बुँदाया माग यानाः वंगु सोमवाः तकया अल्टिमेटम सरकार व माओवादी पार्टीयात ब्यूगु खःसा उगु अल्टिमेटमया दुने नं माग पुरा मजुल धकाः म्हिगः बुधवाःनिसें आन्दोलनया घोषणा याःगु खः । अथे आन्दोलनया घोषणा यायेवं माओवादीया नायः प्रचण्ड, प्रधानमन्त्री भट्टराई, एमालेया मूछ्याञ्जे ईश्वर पोखरेल, सुचना तथा संचारमन्त्री जेपी गुप्ता, माओवादीया नेता कृष्णबहादुर महरा व लडाकु कमाण्डर नन्द किशोर पुनः शिविरय् वंगु खः । रोल्पाय् २४ सय ३८ म्ह लडाकुत दु । इपिं मध्ये २२ सय २५ म्ह जक वर्गीकरण सहभागी जूगु दु । १२ म्ह लडाकुत ला शिविरय् च्वच्वं हे सिइ धुंकूगु दु ।