थप लडाकु समायोजनया कुतः

लडाकुतय्गु आन्दोलन पनेत प्रचण्ड व प्रम शिविरय्

येँ (सन्ध्या टाइम्स)/एकीकृत माओवादीया अध्यक्ष प्रचण्डं प्रमुख दलतय् दथुइ ६५०० लडाकु जक समायोजन यायेगु धकाः सहमति जूगु जूसां थप लडाकुतय्त नं समायोजन यायेगु नितिं थम्हं कुतः याये धयादीगु दु ।

वय्कलं उकिया नितिं दलया नेतातलिसे वार्ता यायेगु खँ नं कनादीगु दु। कैलालीया तालबन्दी लागाय् च्वंगु माओवादी लडाकुया सातौं डिभिजन शिविरया निरीक्षण यायेत उखे झाःम्ह अध्यक्ष प्रचण्डं थप लडाकु समायोजन यायेगु नितिं थम्हं कुतः यायेगु जानकारी संचारकर्मीतय्त बियादीगु खः।
वय्कलं धयादिल 'द्वःछि निद्वः लडाकु थप समायोजन जुल धाःसां छुं नं जुइ मखु, दलतलिसे वार्ता यानाः थुगु विषययात कयाः निकास बीगु जुइ ।'

प्रचण्ड नापं हे शिविरय् थ्यंम्ह एमालेया महासचिव ईश्वर पोखरेलं नं थप लडाकुयात नं समायोजन यायेगु विषययात कयाः सहलह जुइ धयादिल ।

अथे संचारकर्मीलिसे खँ ल्हायेगु झ्वलय् प्रधानमन्त्री नापं माओवादी उपाध्यक्ष डा. बाबुराम भट्टराईनं मंसिर ७ गते तकया दुने द्वन्द्वकालय् कब्जा जुयाच्वंगु जग्गा लित बीगु घोषणा जूगु जूसां म्हिगः प्रमुख स्वंगू दल नापं मधेशी मोर्चाया दथुइ सहमति जूगु कथं मंसिर मसान्तया दुने धाःसा ल्यं दनिगु शान्ति प्रक्रियाया ज्या याये न्ह्यः हे क्वचायेकेगु दावी यानादिल ।

थ्वहे दथुइ ९ बुँदाया माग तयाः आन्दोलनय् कुहां वःपिं माओवादीया लडाकुतय्त नापलायेत वय्कःपिं थौं हे एकीकृत माओवादीया अध्यक्ष प्रचण्ड, प्रधानमन्त्री नापं माओवादीया उपाध्यक्ष भट्टराई, एमालेया महासचिव पोखरेल नापं मेमेपिं नेतात रोल्पाया दहवन लागाय् च्वंगु पाचौं शिविरय् झाःगु दु ।

माओवादी लडाकुतय्सं थःपिनि माग पूरा मयाः धइगु द्वपं बिसें म्हिगः जक आन्दोलनया घोषणा याःगु खः। लडाकुतय्त ह्ययेकाः आन्दोलन मयाकेगु नितिं नेतात शिविरय् वंगु खँ माओवादी नेतातय्सं धाःगु दु। शान्ति प्रक्रिया व न्हूगु संविधान निर्माणय् राजनीतिक दलतय्गु दथुइ जूगु ७ बुँदाया सहमतिं थःपिनिगु भावनायात बेवास्ता याःगुलिं रोल्पाया लडाकुतय्सं आन्दोलनया घोषणा याःगु खः ।

लडाकुतय्सं प्रधानमन्त्री, माओवादी पार्टी, जनमुक्ति सेनाया हेड क्वाटरयात तकं वंगु मंसिर ९ गते हे ९ बुँदाया ज्ञापन पौ लःल्हाःगु खः। इमिसं बिउगु अल्टिमेटम वंगु सोमवाः फुगु खःसा म्हिगःनिसें आन्दोलनया ज्याझ्वः घाइते तथा अपांग योद्धा संघपाखें याःगु खः। आन्दोलनया नितिं उमिसं संघर्ष समिति तकं गठन याःगु खः ।