आयोगय् आदिवासी जनजातित छखे, मेपिं छखे
येँ (सन्ध्या टाइम्स)/राज्य पुनर्संरचनाया निंतिं सुझाव बीत गठन याःगु आयोगया च्याम्ह दुजःत मध्ये आदिवासी जनजाति व मधेसी दुजःत छखे अले खय् ब्रम्हू दुजःत छखे जुयाः धु्रवीकरण जूवंगु दु ।
आयोगया दुजःत राजनीतिक पार्टीं छ्वया हःगु खःसां आयोग दुने उमिगु ध्रुवीकरण धाःसा जातीय रुपं जूवंगु खः। थ्व ध्रुवीकरणय् जनजाति व मधेसी समुदायपाखें वःपिं न्याम्ह छखे व क्षेत्री ब्रम्हू समुदायपाखें वःपिं स्वम्ह मेखे लाः वंगु खः। न्याम्ह दुजःत छथाय् लाःगुलिं संविधानसभाया राज्य पुनर्संरचना समितिपाखें तयार यानातःगु १४ प्रदेशया नक्साया पँ लीपिं दुजःतय् बहुमत जूगु दु ।
वंगु मंगलवाः च्वंगु आयोगया बैठकं छुं नं विषय सर्वसम्मतिं निर्णय यायेगु व छुं जुयाः सहमति मजुल धाःसा अन्तिमय् मतदान यानाः बहुमतं पारित यायेगु धकाः निर्णय याःगु खः। आयोग बैठकं थ्व निर्णय तकं बहुमतपाखें पारित याकूगु खः ।
बहुमतं जूसां निर्णय यायेमाः धकाः पहिचानयात प्राथमिकता बीपिं दुजःत प्रा. कृष्ण हाछेथु, मल्ल के. सुन्दर, स्टेला तामाङ, राजेन्द्र महतो व भोगेन्द्र झां मत बिउगु खःसा पहिचानया आधारय् राज्य पुनर्संरचना याये मजिउ धाइपिं डा. रमेश ढुंगेल, सर्वराज खड्का व सावित्री गुरुङं सर्वसम्मतं जक निर्णय यायेमाः धकाः तर्क तःगु खः। कांग्रेसया सिफारिसय् सदस्य जूम्ह सावित्री गुरुङ जातं थापा खःसा गुरुङलिसे इहिपाः याना वःम्ह खः ।
माओवादीया सिफारिसय् मल्ल के. सुन्दर व स्टेला तामाङ दुजः जुयाः वःगु खःसा मधेसी मोर्चाया सिफारिसय् हाछेथु व महतो वःगु खः। एमालेया सिफारिसय् वःपिं निम्ह मध्ये सर्वराज खड्का व भोगेन्द्र झाया मत धाःसा विभाजित जूवंगु दु। आयोगय् दलत समुदायपाखें छम्ह दुजः अझ थपे याये ल्यं दनि ।
