मिसा हिंसा न्हंकेगु योजना अलपत्र
ख्वप (सन्ध्या टाइम्स)/जिल्ला विकास समिति ख्वपं मिसा हिंसा उन्मूलन यायेगु ताः तयाः न्ह्याकूगु मिसा हिंसा विरुद्धया अभियान अलपत्र जूगु दु। जिल्लाय् जुयाच्वंगु फुक्क मिसा हिंसा नियन्त्रणया निंतिं जिविस कार्यालयय् मिसा डेक्स तकं नीस्वंसां मिसा हिंसा उन्मूलनया ज्या धाःसा न्ह्याके मफुनि। हिंसाया पीडित मिसातय्त न्यायया उचित सल्लाह व कानुनी उपचार बियाः ग्वाहालि यायेगु ताः तयाः वंगु चैतंनिसें हे मिसा डेक्स तःसां आःया अवस्थाय् धाःसा उगु डेक्स खाली हे जुयाच्वंगु दु ।
हिंसापाखें पीडित मिसातय्सं जिविसया मिसा डेक्सय् उजुरी बी फइगु व डेक्सया पुचलं घटनाया यथार्थ छानबिन यानाः आवश्यक कारबाहीया निंतिं सम्बन्धित निकायय् वनाः पहल यायेगु योजना दयेकातःगु खः तर डेक्सय् कर्मचारी हे मदुगु व मिसा डेक्सया बारे प्रचारप्रसार नं मजुसेंलि उगु योजना अलपत्र जुयाच्वंगु दु। प्रचारप्रसार मजुसेंलि उजुरी बीत आःतक डेक्सय् छम्ह नं मिसा मवःगु जिविस कार्यालयं जानकारी बिउगु दु ।
