यौनया इच्छा व बुद्ध शिक्षा

नेहा शाक्य

थुगु ब्रम्हाण्डय् स्वंगू लोक दु। काम लोक, रुप लोक व अरुप लोक। थ्व स्वंगू लोकय् जम्मा ३१ गू भुवन दु। उकी मध्ये काम लोकय् ११ गू भुवन दु। थ्व ११ गू भुवन मध्ये मनुष्य भुवन नं छगू खः। थुगु कामलोकय् च्वंपि पञ्चकाम बिषयय् आशक्त जुयाच्वनीगु जुयाः मनुष्य नं थुगु बिषयय् आशक्त जुयाच्वनीगु खः। भगवान बुद्धं धयाबिज्याःगु दु - ऋतुमति मां व बौया सम्बन्धं जन्म काःवःम्ह प्राणी छसिकथं तःधिकः जुया वल कि रुप, शब्द, गन्ध, रस व स्पर्श धयागु न्यागू प्रकारया काम गुणयात ययेकाः उकिया इच्छा यानाः भुले जुयाच्वनी। इच्छा प्रबल याइगु थ्वहे न्यागू बिषययात पञ्चकाम धाइगु खः। थुगु संसारया मनुष्यं याइगु गुलि नं कुशल अकुशल कर्म दु व फुक्क थ्वहे पञ्चकामपाखें जुइगु खः। अकुशल कर्म १०गू दु, उकी मध्ये काममिथ्याचारा नं छगू खः ।

थ्व संसारय् जन्म जूपिं फुक्क मनूत ज्वःमलाः। गुलिं आयु ताःहाकःपिं, गुलिं आयु चीहाकःपिं, गुलिं बांलाःपिं, गुलिं बांमलाःपिं, गुलिं उच्चकुलयापिं, गुलिं नीच कुलयापिं। गथे थीथी पुसां थीथी प्रकारया फल सइगु खः अथेहे मनुष्यपिनि थीथी कर्मया फलस्वरुप थीथी प्रकारयापिं मनुष्य जन्म जुइगु खः। मनूतय्गु जीवनय् दुवाला स्वयेबलय् अप्वःसिके प्रबल रुपं खने दुगु तृष्णा धयागु मैथुनया इच्छा जुइगु काम तृष्णा खः। थ्व काम तृष्णा छाय् अप्वःसिके दुगु जुइ? थुकी छक्वः बिचाः याना स्वये नु। च्वय् न्ह्यथने धुन जन्म मरणया भवचक्रय् प्राणीतय्सं थीथी कर्म याना वइ चाहे मनुष्य जुइमा चाहे पशु पंक्षी। थथे थीथी कर्म मध्ये न्ह्यागु हे जन्म काःसां प्राणीतय्सं मैथुन कर्म मत्वःतू। थुकिया लिच्वः कथं मैथुन कर्मया संस्कार थुलि क्वातु कि विवेकशील मनुष्य जुयाः जन्म काःसां मैथुन कर्मं विरक्त जुइ तसकं थाकु। मैथुन क्रिया वंश वृद्धिया लागिं अनिवार्य जूगुलिं थुकियात तप्यंक अकुशल कर्म धाये नं मछिं। उकिं व्यभिचारयात जक अकुशल कर्म धाइगु खः। तर थुकी लिप्त जुइबलय् न्ह्याइपु तायेकाः हाकनं हाकनं यइगु उपादान स्वभावं काममिथ्याचारा अर्थात व्यभिचार यायेत तिबः जूवनी ।

संसारय् काममिथ्याचाराया समस्या अति भयावह तर आम समस्या खः। छगू सर्वेक्षण कथं अफ्रिकाय् प्रत्येक दश मिनेटय् छगू बलात्कारया घटना जुयाच्वनी। थौंया युगय् काममिथ्याचाराया घटनात माला स्वःसा यक्व हे लुया वइ। थुकिं पिहां वइगु समस्यात नं अल्याख्य हे दु। काममिथ्याचाराया कारणं सुखमय जीवन नर्कमय जूगु, दुगु ज्या नं मदयेका च्वनेमाःगु, समाजय् अपहेलित जुइकाः बिसिउँ जुइमाःगु, हिंसा प्रतिहिंसाया वातावरण ब्वलनीगु, एड्स व भिरङ्गी थेंज्याःगु यौन ल्वय् जइका च्वनेमाःगु आदि यक्व दसु दु। काममिथ्याचाराय् लिप्त व्यक्तिं बुद्ध शिक्षा कथं गृहस्थीपिंसं पालन मयासें मगाःगु पञ्चशीलया न्यागुलिं शील स्यंकीगु प्रबल सम्भावना दु। पञ्चशीलया छगू शील काममिथ्याचाराय् लगे मजुइगु नं खः। तर थुकी हे लिप्त व्यक्तिं विपरित लिङ्गीयात आकर्षित यायेत थःगु क्षमतां अप्वः खर्च याइ, गुकिया लागि वं खुइगु ज्या याइ। व्यभिचारी ज्या यायेत लज्जा भयं क्षणिक रुपं बचे जुइत वं सुरापान नं याइसा थःगु इच्छा पूवंकेत प्राणीहिंसा तकं यायेत लिचिली मखु। अले दण्ड सजायं बचे जुइत वं मखुगु खँ ल्हाइ। छगू सत्य घटना स्वये नु- छुं दँ न्ह्यः येँय् च्वंम्ह छम्ह ल्याय्म्हया इहिपा जुल तर वया मेम्ह हे मिसा ययेकातःगु जुयाच्वन। थः यःम्ह मिसा नापं वया शारीरिक सम्बन्ध नं दुगु जुयाच्वन उकिं व मिसायात त्वःते मफयाः वं वया हे सल्लाह कथं थः जहानयात चाःहिउ वनेगु त्वहः तयाः पोखराया छगू लजय् यंकाः स्यानाः येँय् लिहां वल। प्रहरीं वयागु कर्तुत पत्ता लगे यात। थौंकन्हय् इपिं निम्हं जेल सजाय भोगे यानाच्वंगु दु। थ्व घटना अबलय् समाचारय् नं वःगु खः। बौद्ध ग्रन्थ कथं ब्यभिचार यात कि मरणं लिपा नं न्हय्गू विपाक भोग याये माली ।

दिघनिकायया सिङ्गाल सुत्रय् प्यंगू कर्म क्लेश मध्ये छगू क्लेश काममिथ्याचारा खः धया तःगु दु। तृष्णा मध्ये नं मैथुनया इच्छां मनुष्यया जीवनय् दुग्यंक हा कायेधुंकूगु दु। उकिं यक्व मनूत खने दयेक वा मदयेक थ्व बिषयय् भुले जुयाच्वंगुलिं सुं ब्यक्तिपाखें अनैतिक ज्या याके मालकि, सुं तःधंम्ह ब्यक्ति�यात पतन याये मालकि बिपक्षीतय्सं काममिथ्याचाराया हे बः काइगु खः। सुयातं काममिथ्याचाराया द्वपं बीवं हे व खँ सही वा गलत जुसां मनूतय्सं तुरुन्त हे पत्याः याइगु व तत्क्षणय् हे उम्ह ब्यक्तियात बांमलाःगु लिच्वः लायेधुंकी। न्हापा बुद्धकालिन अवस्थाय् स्वयम् भगवान बुद्धप्रति नं द्वेष तयाः अबलेया पण्डित धाःपिंसं वसपोलयात पतन यायेत सुन्दरी परिब्राजिका, चिञ्चमाणविका थेंज्याःपिं मिस्त छ्यलाः काममिथ्याचाराया द्वपं बिउगु खः। काममिथ्याचाराया तृष्णा थुलि क्वातु कि स्रोतापत्ति व सकृदागामि मार्ग फल प्राप्तपिं आर्यजनपिं जूसां काम वासनाया भ्याः ल्यना हे च्वनीगु जुल। थ्व काम वासनाया इच्छाया कारणं सकृदागामि मार्ग फल प्राप्तम्ह ब्यक्ति नं हाकनं छकः मनुष्य लोकय् जन्म काः वये माःगु जुलसा अनागामि मार्ग फल प्राप्त जुलकि तिनि प्रतिघ नापं थुगु काम राग नं मदइगु खः ।

त्रिपिटकया २० गू ग्रन्थ संयुक्तनिकाय कथं भगवान बुद्धं नरक वनीपिं स्वंगू प्रकारया मनूत थुज्वःपिं नं खः धयाबिज्याःगु दु, - १ ब्रम्हचर्या पालना मयानाः नं पालना याना धाइम्ह, २. शुद्धरुपं ब्रम्हचर्या पालना याःम्हेसित नं मयाः धकाः दोष बीम्ह, ३ कामयागु दोष मदु धकाः कामभोग यानाच्वनीम्ह। उकिं भगवान बुद्धं भिक्षु भिक्षुणी संघ दयेकेधुंकाः बुद्ध शासन चीरस्थायी यायेया लागि भिक्षु भिक्षुणीपिंसं पालना यायेमाःगु विनय दयेका बिज्यात। उकी मध्ये नं पालना मयासें मगाःगु, गुकियात द्वंकल कि चिवर हे त्वका छ्वयेगु धकाः पाराजिका नियम दयेकाबिज्यात गुगु नियम भिक्षुपिंत ४गू व भिक्षुणीपिंत ८गू दु। थुकी मध्ये निखलःसितं न्हापांगु नियम हे 'सहवास मयायेगु' धकाः धया तःगु दु। आनन्द भन्तें भगवान बुद्धयाके मिस्त नाप गथे यानाः व्यवहार यायेगु धकाः न्यंबलय् बुद्धं- इमित मस्वयेगु, स्वयेमाल धाःसा खँ मल्हायेगु व खँ ल्हायेमाल धासा स्मृति तयाः खँ ल्हायेगु धकाः धयाबिज्याःगु थ्वहे काम रागपाखें बचे जुइया लागि खः। उकिं निर्वाण साक्षात्कार यायेगु खःसा काममिथ्याचारा मयायेगु जक मखु ब्रम्हचर्या हे पालना यायेमाःगु जुल ।

धम्मपदया नरक वर्गय् धयातःगु दु - प्रमादि जुयाः परस्त्री गमन याःम्हेसिया गति प्यंगू जुइ - अपुण्य लाभ जुइ, सुखं द्यने फइ मखु, मेपिसं निन्दा याइ, नर्कय् दुःख भोग याइ।
उकिं थज्याःगु दुःख भोगं बचे जुइत पंचशील क्वातुक्क पालना यायेमाल ।

More Stories Like this