अन्तिम पटक थपे जूगु खुलाया ई

अन्तरिम संविधानया झिंछक्वःगु संशोधन यासें संविधानसभाया म्याद मेगु खुला थपे यायेगु ज्या म्हिगः सम्पन्न जुल। थ्व ल्याखं आः संविधानसभाया म्याद २०६९ सालया जेठ १४ गते तक कायम जूगु दु। संविधानसभाया चुनाव जूबलय् राजनीतिक दलतय्सं निदँया दुने संविधान च्वये सिधयेके धकाः बचं बिसें निदँ हे जक ई कायेगु व्यवस्था याःगु खः। वास्तवय् मुक्कं संविधान दयेकेगु हे जक ज्या याना वंगु खःसा निदँया दुने ज्या सिमधइगु नं मखु। तर अथे मयासे राजनीतिक पार्टीत सत्तापाखे अप्वः केन्द्रित जूवंगुलिं निदँया दुने संविधान दयेके सिमधल। व, फलतः संविधानसभाया म्याद निदँया थासय् प्यदँ जूवन। संविधानसभाया म्याद थपे यायेगु लागिं अन्तरिम संविधानय् जूगु थ्व प्यक्वःगु संशोधन खः। थुगुसी संविधानसभाया म्याद थपे यायेगु ज्यायात हे अन्तिम दयेकेमाः धकाः सर्वोच्च अदालतं नं आदेश बिउगु दु। खतुं सर्वोच्चया आदेशयात सुनां नं राजनीतिक रुपं टिकाटिप्पणी याःगु मदु। उकिं आः थपे जूगु म्यादयात राजनीतिक दलतय्सं निश्चय नं गम्भीर रुपं हे छ्यली धकाः आशा यायेगु थाय् दु। विपक्षी दलतय्सं राष्ट्रिय सरकार गठनया ज्या स्पष्ट मजूतले म्याद थपे यायेगु ज्या नं न्ह्याः वनी मखु धकाः ख्याच्वः बियाच्वंगु खः। तर लिपा वयाः म्याद थपे यायेगु ज्याय् सकलें दलत सहज रुपं तयार जूगु कारणं राष्ट्रिय सरकार गठन यायेगु खँय् दलतय् दथुइ 'भद्र सहमति' जूगु दयेमाः धकाः नं याउँक अनुमान यायेफु। आःया खुला सरकार गठनया लागिं मखु संविधान लेखनया लागिं खः धकाः दलतय्सं पूर्ण रुपं हे महसुसु यायेमाःगु दु ।

More Stories Like this