भारतलिसे जूगु निगू व्यापारिक सन्धी

नेपाल-भारत दथुइ आः नकतिनि जूगु मन्त्रीस्तरीय दोहोर कर मकायेगु सम्बन्धी सन्धी (डीटीएए) पाखें नेपाःया औद्योगिक ख्यलं छुं भचा राहत काःगु खने दत। थ्व स्वयां न्ह्यः भारतलिसे बिप्पा सम्झौता जूगु इलय् हे थ्व सन्धी नं याइगु खँ दुगु खः। तर भारतं सन्धीइ छुं भचा संशोधन याये मानिगु त्वह तःगुलिं अबलय् थ्व सन्धी मजुल।प्रधानमन्त्री डा. बाबुराम भट्टराईया भारत भ्रमणया इलय् जूगु बिप्पा व आः जूगु डीटीएए सन्धीपाखें भारत स्वयां नं नेपालं अप्वः लबः काइगु खँ आः चर्चाय् दु। खास यानाः भारतीय लगानीकर्तातय्त थ्व सन्धीं अप्वः उत्साहित याइगु व उमिसं नेपालय् अप्वः लगानी याः वइ धइगु अनुमान जुयाच्वंगु दु। नेपाःयात विदेशी लगानीया तःधंगु आवश्यकता जुयाच्वंगु थ्व इलय् भारतीय लगानीकर्तात दुहां वल धाःसा राहत जुइगु महसुस यानाः नेपालं थ्व निगू सन्धी यायेमाःगु खँ न्ह्यःने हयाच्वंगु दु। छुं जुयाः थ्व निगू सन्धी यानां नं भारतीय लगानीकर्तात नेपाःप्रति आकर्षिक मजुल धाःसा सन्धी यानाया अर्थ दइ मखु। यदि लगानी प्रशस्त दुहां वल हे धाःसां उकी नेपाः दंग जुइगु अवस्था नं मदु। भारतीय लगानीकर्तातय्सं नेपालय् लगानी यानाः दुकाइगु लबः ला फुक्क थःगु हे देशय् यंकी। नेपाःयात छुं भचा रोजगारी व छुं भचा राजश्व हे जक दइगु खः। उकिं राज्यया कुतः विदेशी लगानी यक्व दुकायेगु सिबें नं स्वदेशी लगानीकर्तायात प्रोत्साहन बीगु जुइमाः। नेपालय् वयाः भारतीयतय्सं उद्योग संचालन याये फुसा नेपाःमितय्सं मफये माःगु छुं खँ मदु। विदेशी लगानी छगू जक आयामयागु जुइसा स्वदेशी लगानी बहुआयामिक जुयाच्वनी ।

More Stories Like this