नेपाःया संस्कृति पिज्वःगु कतांमरि ब्वज्या
'रिफ्लेक्सन अफ इथनिक गु्रप एण्ड कल्चर अफ नेपाल' शीर्षक तयाः म्हीगं निसें येँय् कतांमरि ब्वज्या न्ह्यात ।
मय्जु पद्मश्री श्रेष्ठं दयेकादीगु उगु कतांमरि ब्वज्याय् ३३ गू डिजायनया कतांमरित ब्वयातःगु दु। नेपाःया थीथी लागाय् च्वंपिं २२ गू जातिया संस्कृति पिज्वःगु लुयात वय्कलं कतांमरिया माध्यमं प्रस्तुत यानादीगु खः। झाँकी, अय्लाः कयाच्वंगु, इहिपा, कुमारी, डोको दयेकाच्वंगु लुया कतांमरि अतिकं आकर्षक खनेदु। अथे हे मदुम्ह जुजु वीरन्द्रया माचाछिं जःपिनिगु नं वय्कलं कतांमरि दयेकाः ब्वयादीगु खः। अथे हे वय्कलं दयेकादीगु नेवाःतय् इहिपाया झ्वलय् ख्वाः स्वः वनेगु लुया कतांमरि नं अतिकं भब्य खनेदु ।
वय्कलं थुगु ब्वज्याय् ब्वयादीगु छुं नं कला धाःसा ममीगु व लिपा छगू संग्रहालय दयेकाः अन हे तयेगु खँ कनादीगु खः।
थुगु ब्वज्याया निंतिं वय्कलं वंगु प्यदँ न्ह्यवंनिसें तयारी याना च्वनादीगु खः। थ्व धुंकाः आः याकनं हे मेगु ब्वज्या नं यायेत्यनागु खँ वय्कलं कनादीगु दु। थुगु ब्वज्या वइगु बिहिवाः क्वचाइ ।
नेपाल पर्यटन वर्षया लसताय् पर्यटन प्रवर्द्धन नं यायेगु ताः तयाः तना वनाच्वंगु नेपाःया थीथी संस्कृतिया जगेर्ना यायेगु नापं हस्तकला प्रदर्शन व प्रवर्द्धन यायेगु समेत उद्देश्यं थुगु ब्वज्या यानागु खँ वय्कलं कनादिल ।
