संविधानसभा मेगु खुला थप

मंसीर महिनाया दुने ल्यं दुगु शान्ति प्रक्रिया पूवंकीगु

येँ (सन्ध्या टाइम्स)/प्रमुख स्वंगू दल व मधेसी मोर्चाया शीर्ष नेतातय् दथुइ राष्ट्रिय सहमतिया सरकार याकनं हे दयेकेगु नापं संविधानसभाया म्याद नं खुला थपे यायेगु सहमति जूगु दु। थौं सुथय् शान्ति तथा पुनःनिर्माण मन्त्रालयय् च्वंगु बैठकय् थ्व सहमति जूगु खः। उकिं थौं सनिलय् ३ बजे च्वनीगु संसदया बैठकं संविधान संशोधन यानाः खुला म्याद थपे याइगु जूगु दु ।

संविधानसभाया म्याद थप यायेगु विषययात कयाः कार्यतालिक तयार यायेगु भाला बिउगु कार्यदलं खुला म्याद थप यायेगु धकाः पेश याःगु प्रस्तावयात दलया बैठकं पारित याःगु खः। कार्यदलया म्हिगः च्वंगु बैठकं खुलाया म्याद थपे यायेत शीर्ष नेतातय्त सुझाव बीगु धकाः निर्णय याःगु खः ।

अथे हे राज्य पुनर्संरचना आयोगया प्रतिवेदन वयेवं हे राज्य पुनर्संरचना सम्बन्धी ज्या निलाया दुने पूवंकेगु सहमति नं याःगु दु। लिसें राष्ट्रिय सहमतिया सरकार याकनं गठन यायेगु निंतिं वाःया छकः दलया नेतातय्गु मुँज्या च्वनाः प्रगतिया समीक्षा यायेगु सहमति नं याःगु दु। वंगु आइतवाः च्वंगु स्वंगू दल नापं मधेसी मोर्चाया शीर्ष नेतातय्गु बैठकय् संविधानसभाया म्याद गुलि थपे यायेगु धइगु विषयय् विवाद जूगुलिं सहमति यायेत प्यम्हेसिया कार्यदल दयेकूगु खः ।

कार्यदलय् माओवादीपाखें पोष्ट बहादुर बोगटी, नेपाली कांग्रेसपाखें कृष्ण सिटौला, एमालेपाखें ईश्वर पोखरले व मधेशी मोर्चापाखें जेपी गुप्ता च्वनादीगु खः। थौं च्वंगु शीर्ष नेतातय्गु बैठकं सर्वोच्च अदालतया आदेशयात मध्यनजर यानाः कार्यदलया प्रस्ताव कथं संविधानसभाया कार्यकाल खुला थपे यायेगु सहमति याःगु खँ माओवादीया सचिव नापं कार्यदलया दुजः पोष्टबहादुर वोगटीं संचारकर्मीतय्त कनादीगु दु। बैठकं ७ बुँदाया सहमति लिपा शान्ति प्रक्रियाय् प्रगति जूगु निष्कर्ष पिकासें शान्ति प्रक्रियाया ल्यं दनिगु ज्या मंसिर मसान्तया दुने क्वचायेकेगु सहमति नं याःगु दु ।

थ्व सिबें न्ह्यः याःगु म्याद थप विरुद्ध तःगु रिटयात कयाः वंगु शुक्रवाः सर्वोच्च अदालतं थःगु फैसला न्यंकुसें आःया थपे जुइगु खुलाया म्याद हे अन्तिम जुइ, वयां लिपा म्याद थपे याये दइ मखु धाःगु खः। सर्वोच्चं बिउगु उगु आदेशं दलतय् दथुइ वादविवाद पिकाःगु खः। दलया नेतात संविधानसभाया म्याद थप यायेगु पक्षय् दुसां गुलि ई थप यायेगु धइगु विषयय् धाःसा विवाद जुयाच्वंगु खः ।

एकीकृत माओवादी नापं मधेशी मोर्चापाखें खुला म्याद थप यायेगु प्रस्ताव तयाच्वंगु खःसा कांग्रेस व एमालें स्वला जक म्याद थप यायेगु धकाः अडान कयाच्वंगु खः। तर सर्वोच्चया आदेश लिपा दलया नेतात छगू हे थासय् वःगु दु। सरकारं संविधानसभाया म्याद खुला थप यायेगु नितिं प्रस्ताव नापं अन्तरिम संविधान २०६३ या ११ क्वःगु संशोधनया प्रस्ताव नं व्यवस्थापिका संसदय् प्रस्तुत याये धुंकूगु दु। थ्व स्वयां न्ह्यः दल्कतय्सं स्वला म्याद थप याःगु खः गुगु कन्हय् फुइत्यंगु दु ।