लोकन्थलीइ बर्डफ्लु खने दयेवं नियन्त्रण याइपिं सक्रिय

थिमि (सन्ध्या टाइम्स)/मध्यपुर थिमि नगरपालिका वडा नं. १६ लोकन्थलीया मनहरा खुसि लागाय् स्थानीय चन्द्र बहादुर तामाङया फार्मय् खाचातय्के बर्डफ्लु ल्वय् खने दयेवं पशु विभागया दक्ष जनशक्ति उगु लागाय् थौं सुथंनिसें रोग नियन्त्रण यायेत सक्रिय जूगु दु।
केन्द्रीय पशु रोग अन्वेषण महाशाखा त्रिपुरेश्वरं बर्डफ्लु खनेदुगु खँ पुष्टी याःगु खः। म्हिगः बर्डफ्लु खने दयेवं हे मन्त्रिपरिषद्या बैठक च्वनाः उगु ल्वय् खने दुगु लागा नियन्त्रणय् कयाः ज्या यायेत पशु विभागयात निर्देशन बिउगु खः ।

उकिं थौं सुथंनिसें हे दक्ष जनशक्ति अन सक्रिय जुयाच्वंगु दु। कार्तिक २३ व २४ गते तामाङया फार्मय् ३५ म्ह खा छक्वलं सीवं तामाङं पशु सेवा कार्यालयय् स्वापू तःगु खः। रोग अन्वेषण महाशाखां शंका यानाः परीक्षण यायेगु लागिं इलय् भेटनरी प्रयोगशाला बेलायत छ्वःगु खः। अनं बर्डफ्लुया कारणं हे खा सीगु पुष्टी याःगु दु। मनहरा खुसि लागाय् ५०० खा व हँय् स्याना छ्वये धुंकूगु दु ।

खा ज्वनावःगु ट्रक कुतुंवनाः छम्ह सित
थौं सुथय् धादिङं खा ज्वनाः येँय् वःगु ट्रक भीमढुंगा लागाया नर्सरी भञ्ज्याङय् ३ मिटर क्वय् कुतुंवनाः दुर्घटना जूगु दु। उकी लानाः गुदँ दुम्ह मचा छम्ह सीगु दु। दुर्घटनाय् गाडीया चालक व सहचालक नापं स्वम्ह घाःपाः जूगु दु। सुथय् साढे ४ बजे बा. २ ख ८५२१ नम्बरया उगु ट्रक कुतुंवनाः चालक लभ तामाङ, सहचालक माइला तामाङ व इन्द्र तामाङ घाःपाः जूगु दु। दुर्घटनाय् लानाः घाःपाः जूम्ह धादिङ छत्रे देउरालीया गुदँ दुम्ह रोमन तामाङ वासः याकुयाकुं सीगु खः ।