कमलाछीइ बँपसः चीकल
येँ (सन्ध्या टाइम्स)/असन कमलाछी टोल सुधार समितिया ग्वसालय् वंगु आइतवाःनिसें बँपसः चीकेगु ज्या न्ह्यात। असनं निसें न्हूपुखू तकया लागाय् गनं नं गुगुं नं कथंया बँपसः मतयेकेगु समितिया ग्वसाः दु। थुगु ज्याय् प्रहरीया नं ग्वाहालि काःगु खः। थुगु ज्यायात निरन्तरता बीत जनसेवा प्रहरी प्रभाग व दरबार मार्ग प्रहरी प्रभागं नं ग्वाहालि याइ। वंगु जेष्ठ १ गतेनिसें समितिं उगु लागाया बँपसः चीकेगु ज्या न्ह्याकूगु खः। मोहनिबलय् फाट्टफुट्ट पसः तःगु खःसां स्वन्ति नखःयात ध्यानय् तयाः न्यान्हु तक छुट बिउगु खः। थ्वयां लिपा प्रहरीलिसे हे मिले जुयाः बँपसल्याःतय्सं पसः मचीकुगुलिं आः हाकनं बँपसः चीकेगु कुतः यानागु खँ समितिया नायः उत्तमदास तुलाधरं कनादिल ।
