रोल्पाया लडाकुतय्सं आन्दोलन याइगु
येँ (सन्ध्या टाइम्स)/९ बुँदे माग तयाः रोल्पा दहवनया लडाकुत आन्दोलनय् कुहां वःगु दु। प्रमुख राजनीतिक दलतय्सं शान्ति प्रक्रिया व संविधान निर्माण बारे याःगु ७ बुँदाया सहमतिं थःपिनिगु भावना मथुइकल धासें उपिं आन्दोलनय् वःगु खः ।
इमिसं ९ बुँदाया माग नापं वंगु मंसीर ९ गते प्रधानमन्त्री डा. बाबुराम भट्टराई, जनमुक्ति सेनाया हेडक्वार्टर व माओवादीयात ज्ञापन पौ बिउगु खः। थःपिनि माग पूरा जुइला धकाः म्हिगः अन्तिम ई तक पियाच्वनं नं संवोधन मजूगुलिं आन्दोलन यायेत बाध्य जूगु खः घाइते तथा अपांग योद्धा संघया दुजः राजेन्द्र रावतं धयादीगु दु। आन्दोलन यायेत सुशील चौधरीया नेतृत्वय् घाइते तथा अपांग योद्धा संघ संघर्ष समिति नं गठन याःगु दु ।
असन्तुष्ट लडाकुतय्सं थःपिनि ओहोदा व दर्जाया आधारय् मजुसे जनमुक्ति सेनाय् जुयागु प्रवेश व सेवाया आधारय् प्याकेज बीमाःगु, घाःपाः जूपिं व अपांगतय्त आजीवन पेन्सनया व्यवस्था यायेमाःगु नापं थीथी कथंया माग तयाः अथे आन्दोलन यायेत्यंगु खः ।
