जेठ १८ छाय् थौं नं सान्दर्भिक
स्थानीय निकायय् नेवाः भाय्यात नं छ्यलाबुला यायेगु थप छगू भाय्या मान्यता बीगु धकाः येँ महानगरपालिकां याःगु निर्णयया विरुद्ध सर्वोच्च अदालतं बिउगु फैसलां थौं नं नेवाः लगायत देय्या सकलें आदिवासी जनजातिया नुगलय् लाका बिउगु घाः लंगु मदुनि । वास्तवय् नेवाःतय्सं थ्व देय् झी नेवाःतय्गु नं खः लाकि मखु धकाः नुगलय् ल्हाः दिकाः बिचाः याःगु दिं वहे खः जेठ १८ गते । अबलय् निग्ति थें जुयाः च्याःगु थ्व मि आः नेवाःतय् लागिं बिस्कं स्वशासित लागा माल धइगु माग ज्वनाः न्ह्यःने वनाच्वंगु दु । यदि नेवाःतय्सं आः थःगु हे स्वशासित लागा काये मफुत धाःसा ०५७ सालया जेठ १८ गते सर्वोच्चं बिउगु थेंज्याःगु फैसलात न्हिंन्हिं हे जारी जुइगु खतरा वइ । उकिं आः नेवाःतय्सं चीधंगु खँय् खुद्रा आन्दोलन यानाच्वनेगु सिबें समग्र मागयात कःघाइगु वृहत् आन्दोलन यानाः एकमुष्ट उपलब्धी चूलाकेगु ज्या यायेमाःगु दु । अज्याःगु हे आन्दोलनया छगू अंग खः कन्हय् जुइत्यंगु नेपालमण्डल बन्द । जेठ १८ या प्रशंग पुलां जूगुलिं आः नं उकियात लुमंका च्वनेमाःगु आवश्यकता दनि ला धाईपं नं दु । वास्तवय् न्ह्यसः नाजायज मखु । तर यथार्थ छु धायेबलय् जेठ १८ गते सर्वोच्चं बिउगु फैसला आः पुलां जुइधुंकूसां नं देय्या राज्यसत्ता व राज्य संचालनया जिम्मा कयाच्वंपिं राजनीतिक पार्टीतय् मानसिकता अनं च्वय् विकसित जुइफुगु मदुनि । उमिगु बिचाः व मानसिकता अझ नं 'जेठ १८’ य् हे थानाच्वंगु दनि । अय् जुयाः नं झी नेवाःतय्सं जेठ १८ यात अझ नं हाकुगु न्हिया हे रुपय् हने मालाच्वंगु खः । उकिं कन्हय्या बन्दयात सकलें छधी जुयाः ताःलाकेगु झी सकलें नेवाःतय् दायित्व जुइ ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
