जागीरदार ?

ज्ञानेन्द्ररत्न वज्राचार्य

जागीरदार धइम्ह
करपिनिगु अधिनय् थःन्ह्याःवनेमाःम्ह ।
थःगु स्वतन्त्रतायात
लाकाम्हंच्वानाः
घालय् मल्ताचि हा हा यानाः
त्वाकः समान चुपिया मारं
कुचाकुचा दःसां नं
चुपचाप छुं हे मधासे
धस्वानाः च्वनाच्वनेमाःम्ह ।
क्वछुनाः क्वमालि जुयाः
पंजलय् कुनातःम्ह झंगः स्वरुप
थःगु लागां पिहाँवनेमफूम्ह ।
खः व हे खः जागीरदार धइम्ह ।

थःत जुयाच्वंगु
अन्यायया विरुद्धय्
चिल्लाय् दनाः धुर्तम्ह हाकिमया न्ह्यःने
जवाल सवाल यायेमफुम्ह
प्वाःछग्वःया निंतिं
नामर्द जुयाः
चि नःम्ह खा थें
झ्वाता थें
थिङ्ग थ्व समाजय् दनाच्वनेमाःम्ह
खः व हे खः जागीरदार धइम्ह ।

छक्का, पञ्जा, छलकपतं
चाकरी, चुकरी, जालझेलं
बढुवा, सरुवा प्रमोशन जुइम्ह ।
इमान धर्म,
इज्जत, ब्यइजत मस्यूम्ह
अन्याय, अत्याचारया
कूमि घुर्का नं म्वायेमाःम्ह ।
खः व हे खः जागीरदार धइम्ह ।

न्हयाथासं सडक गल्ली
त्वाःत्वालय्
मियातइगु न्याये छिंगु
छुचुनय् क्यूगु
मुस्या बागः नं लिकया नइपिं
साहु महाजन नेता धाःपिसं
छिंक अपुक
कतिलाःगु भावय्
न्यानायंकीगु
तुसि, पासि व वःसि खः
खः व हे खः जागीरदार धइम्ह ।

More Stories Like this