चित्रकलाय् नेपाःया यथार्थ किपा

ल्होसारया लसताय् येँया तिंख्यलय् प्याखँ ल्हुयाच्वम्ह छम्ह तामाङ मिसा राज्यया मिखाय् बांला मजू । तर राज्यया हिन्दू राज्यात्मक सत्ताया मिखा पिने वनाः स्वयेगु खःसा इण्डो-आर्यान वर्णय् मलाम्ह व मिसा तसकं बांला । थुगु हे मिखाँ स्वयेफुसाः झीगु एकात्मक देय् संघीय व्यस्थाय् दुहांवंगु तायेकेफइ । थुगु अभिव्यक्ति खः -- यलया कस्मोपोलिटियन प्रशिक्षण केन्द्रय् जूगु छगू चित्रकला प्रदर्शनीइ न्ह्यब्वयातःगु छपा किपाया ।



वंगु नोभेम्बर ११ निसें न्ह्याःगु कलाकार माकि गुरुङया एकल चित्रकला ब्वज्याय् थःज्यागु हे देय्या वर्तमान अवस्था, राज्यया असमान व्यवहार, सर्वहारा वर्गया जनजीवन व विश्व भूमण्डलिकरणं आदिवासीतय्त लाकूगु लिच्वःया यथार्थयात न्ह्यब्वयातःगु दु ।

ब्वज्या स्वयेगु झ्वलय् वय्कलं वंगु दच्छिया दुने दयेकूगु चित्रकलाय् मनूतय् भावनायात बांलाक प्रस्तुत यानादीगु दु । 'थुगु किपा साउदी अरबय् वनाः निदँ ज्या यानाः लिहांवम्ह मनूया खः ।' गुरुङं ध्वाथुकूसें धयादिल, - 'वं साउदीइ ज्या याये वनेत गाँमय् त्यासा कयाः वन । तर निदँ ज्या यानाः लिहांवगु इलय् सामन्तीतय्सं काःगु तच्वःगु ब्याजं वयाः फुक्क धाइथें कमाई फुत । आः वयाके मुक्कं पीद्वः जक ल्यँ दनी ।'



माकिया चित्र स्वया वनेगु झ्वलय् छगू ध्याकूने 'जनयुद्ध' छ्यँ छुयाः स्वपा किपात तयातःगु दु । किपात खः -- माओवादी नायः प्रचण्ड, माओवादी सैन्य कमाण्डर नन्दकिशोर पुन 'पासाङ' व छम्ह माओवादी जनसेनाया ।



'थुगु स्वपा किपा मध्ये निम्ह सकसिनं सिउपिं खः, वय्कपिं आः जनयुद्ध लिपा उच्च पदय् तकं थ्यनेधुंकल । तर दथुइ च्वंगु किपा छम्ह जनसेनाया खः, सुया तुतिइ जनयुद्धया इलय् गोलीं लाःगु दु ।' वय्कलं धयादिल, 'आः वयाः झिदँ तक देय्या निंतिं ल्वाम्ह योद्धायात मुक्क न्यागू-खुगू लख जक बियाः छेँय् लितछ्वयेगु तयारी जुयाच्वंगु दु । उलिं ध्यबां ला उम्ह योद्धाया गोलीं लाःगु अपरेशन यायेत तकं मगाः ।'

दच्छि तक थम्हं नापलाना खँल्हानापिं नापं थीथी पत्र पत्रिकाय् वःगु बुखँ व किपायात संकलन यानाः माकिं थःगु चित्रकलाया सुरुवात यानादीगु खः । छाय् लोक्टा भोँतय् चित्रकला च्वयादीयागु धइगु न्ह्यसलय् वय्कलं सरल भासं धयादिल - 'थुगु भ्वँ नेपालय् निर्माण जूगु खः, नेपाली सामानया प्रवद्धन यायेत थुकी हे यानागु ।'



अबु नेपाली व मां जापानीज जूसां नेपाः प्रतिया मायां जापानया नागरिकता त्वःता २६दँया माकिं नेपाःया नागरिकता कयाः येँ च्वनाच्वनादीगु दु । साउण्ड इन्जिनियर माकिं थ्वस्वयां न्ह्यः थःगु निगू एकल चित्रकला ब्वज्या जापानय् यायेधुंकूगु दु । मुक्कं २२गू चित्रत दुथ्याकतःगु उगु चित्रकला ब्वज्या २५ नोभेम्बर तक न्ह्याःगु खः ।

More Stories Like this