म्हगसः

विराज कायस्थ

न्ह्याबलें क्वथाय् मतःस्याना ख्युँका च्वनिम्ह जि। थौँ झलमल्ल मत च्याका छंगु किपा न्ह्योने तया जि मुसुहुँ न्हिलाच्वना।

छ गुली बाँला !
छंगु मिखा !
छंगु न्हिलासु !

जिं मिखा तिस्सिना छन्त म्हगसय् सालेगु कुतः याना। छंगु लुमन्ति दुने दुब्यंक सुलावनेगु मति तया । तर थौँ न्ह्य् मव, अहँ व हे मव, तिस्सिना तैगु जिगु मिखाया धकिँ दुने छ जि थेँ मुसुहुँ न्हिला हे च्वन । जिं सह याये मफुत ।

छंगु मतिनाय प्रभाव ख ला ?
केवल छगु आवेश ला ?
की छंगु मोहनी जक्क ? जिं थुइके मफुत !

मखुत! जिं मिखा मकँस्यें जी हे मजिल। तर छु जुगु थ्व ? जिगु क्वथाला हाकनं ख्युँसे च्वने धुंकल खनी । मत ला सीइ धुंकल खनी । अयसां जिं अन्धकारयागु ल्हाहाती आत्मसमर्पण याय्गु छाय् ? जिं दुनुगलंनिसें संकल्प याना -

"थ्व अन्धकार दुने सां छन्त खन्का हे त्वते जिं!"

मधायकं मिखा न्ह्योने छंगु किपा हाकनं लुया वल । ख्वबिं भयबि थेँ जुल जिगु मिखा! झन् छंगु न्हिलासुं जिगु नुगःया निंतिं म्ये छपु हालाबिल! अहह! गुली यईपुगु थ्व अन्धकार !

अफसोस् तर जिगु ख्वबि पिज्वे न्ह्यो हे, व म्ये पुवने न्ह्यो हे, झलमल्ल हाकनं मत च्यात । घनघोर जं थिना छंगु किपा तछ्याना थकल । जिगु म्हगसः उख्यला थुख्यला मदयका झ्वाः जुल । ख्वबि या धः अल्ये व म्येया सः च्वात्त ध्यनाबिल व पापी जः वं ।

हाय!! छ बिनं वगु थ्व जः जिगु निंतिं बरदान मखु श्राप जुयाबिल। थ्व जः वं जित कां याना थकल !

Related Stories

क्व: [चिबाखं]
जित सुनां मधा:

More Stories Like this

बाखं च्वये मखुनी
परिवेश (मुक्तक बाखं)
बायावंगु लँपु
हेँग्वाः जूम्ह मनू
ब्लू-डल बाखं ब्वनेधुंकाः