द्वन्द्व पीडित मस्तय् नामय् पार्क तयार

त्रिभुवन अन्तर्राष्ट्रिय विमानस्थल दुहां वनेगु मू लुखाया न्ह्यःने करिब ६ रोपनी जग्गाय् देशय् न्ह्याःगु झिदँ ताःहाकःगु द्वन्द्वया इलय् पीडित मस्त व सीपिनि नामय् छगू आकर्षक पार्क तयार जूगु दु। शान्ति पार्क धयातःगु उगु पार्क सिद्धार्थ आर्ट ग्यालेरीया विश्व शान्ति कार्यक्रम अन्तर्गत बाल स्मृति कोषपाखें निर्माण याःगु खः। बालबालिका शान्ति स्मृति पार्क नामं नांजाःगु उगु पार्क वंगु कार्तिक १७ गते बिहिवाः युनेस्कोया प्रतिनिधि हाना सिंगरं उलेज्या यानादीगु खः।
विश्व शान्ति प्रचार मञ्च व सिद्धार्थ आर्ट ग्यालेरीया मंकाः लगानीइ उगु पार्क तयार याःगु खः। उगु पार्कया शान्ति स्तम्भय् झिदँ तकया जनयुद्धय् सीपिं मस्तय्गु नां दुथ्याकातःगु दु। भूगोल पार्कय् १९९० सालया तःभुखाचय् दुना वःगु छेँ दनेत राज्ययाके त्यासा काःपिं मनूतय्गु त्यासा मिनाहा यानाः उमिगु भ्वं तयातःगु दु धाःथें थुगु पार्कय् नं युद्धय् सीपिं सलंसः मस्तय् नां दुतिनातःगु दु। मस्तय्त दुहां वंसानिसें हे आनन्द वइगु थाय् कथं तसकं हे बांलाक श्रृंगार व सजावट यानाः दयेका तःगु उगु क्यब व पार्क तयार यायेत येँ महानगरपालिकापाखें जग्गा दान बिउगु खः। न्हय्दँ बिकाः उगु पार्क तयार याःगु खः।
राजनीतिक युद्धया कारणं आपालं अबोध व निर्दोष मस्तय्गु ज्यान वनेधुंकूगु खँय् आपालं शान्तिप्रेमि नेपाःमितय् चिउताः वंगु नं खः। अथे खःसां उमिगु निंतिं छुं याये फइगु स्थिति मदयाच्वंगु खः। अज्याःगु हे खँयात वाःचायेकाः म्होति नं सिद्धार्थ आर्ट ग्यालेरी थेंज्याःगु विदेशी चित्रकार व फोटोग्राफरतय् किपा ब्वज्यात यानाः थःपिंत प्रतिष्ठित संस्था कथं मान्यता चूलाकाच्वंगु संस्थां थज्याःगु कथंया ज्या यानाक्यंगु दु। द्वन्द्व पीडित मस्तय्त केन्द्रित यानाः सिद्धार्थ आर्ट ग्यालेरीं थ्वहे झ्वलय् पिथंगु शान्ति सम्बन्धि छगू कविता सफू नं ज्याझ्वलय् विमोचन याःगु खः। पार्कय् छगू तजाःगु स्तम्भ नं दयेकातःगु दु। स्तम्भया प्यखेरं नेपालय् दुगु थीथी धर्मया प्रतीक चिं नं तयातःगु दु।
सन् २००३ य् थ्व पार्क दयेकेगु ज्या शुरु जूगु खः। प्यसःम्ह स्कुल ब्वनीपिं मस्त द्वन्द्वय् लानाः सीधुंकूगु खँयात ध्यानय् तयाः अज्याःपिं मस्तय्गु लिहां मवइगु जीवनयात लुमंकाः उगु पार्क तयार याःगु खःसां थुकिं न्हू न्हूपिं मस्तय्गु लागिं नं तःधंगु हे हौसला बीगु खनेदु। थन इलय् ब्यलय् साहित्यिक ज्याझ्वः, सांगीतिक ज्याझ्वः व थीथी कासात यानाः मस्तय्गु बौद्धिक व मानसिक विकासया गतिविधित नं यानाच्वनेगु योजना दुगुलिं कन्हय् वनाः देशया बांलापिं नागरिक थुगु पार्कं नं तयार याये फइगु आशा यायेगु थाय् दु।
बसन्तपुलीइ छम्ह विदेशीं वाद्वँया द्यःने बन्दूक धस्वाकातःगु खनाः थ्व छु धकाः न्यंबलय् जिमि नयेत माःगु थज्याःगु वा नसा फुक्कं द्वन्द्वया कारणं नये मखंक बन्दूक न्यायेगुली खर्च जुयाच्वन धायेत थ्व प्रदर्शनी यानागु खः धायेवं छम्ह विदेशीया हे पहलय् न्हापां सिद्धार्थ आर्ट ग्यालेरीं थ्व ज्याया जिम्मेवारी क्वबियाः ज्या न्ह्याकूगु खः। न्ह्याथेसां न्यादँ तकया युद्धविराम व आः निगूगु बृहत् शान्ति सम्झौता क्वचाये धुंकाः जूसां थ्व पार्क तयार यानाः छ्यलाबुलाय् वःगु बांलाःगु हे खँ जूगु दु।

More Stories Like this