सरकारं राजीनामा बीधुंकाः छु ?

प्रतिपक्षी पार्टी नेकपा (एमालें) पार्टीगत रुपं हे निर्णय यासें प्रधानमन्त्री डा. बाबुराम भट्टराईया राजीनामा माग याःगु दु। स्वंगू तःधंगु दल व मधेसी मोर्चा दथुइ जूगु न्हय्गू बुँदाया सहमतियात कार्यान्वयन यायेगु लागिं नं प्रधानमन्त्रीं राजीनामा यायेमाः धइगु माग एमालें याःगु खनेदु। न्हय्गू बुँदाया सहमतिइ 'राष्ट्रिय सरकार स्वनेगु' खँ न्ह्यथना तःसां उगु सरकार सुयागु नेतृत्वय् गठन याइ धइगु खँ धाःसा धयातःगु मदु। उकिं सरकारया नेतृत्व सुनां यायेगु धइगु खँय् विवाद पिहां वयाच्वंगु दु। थ्वहे सन्दर्भय् एमालें नं सरकारया राजीनामा माग याःगु जुइमाः। यदि सुयां नेतृत्वय् राष्ट्रिय सरकार गठन यायेगु सहमति जुल धाःसा प्रधानमन्त्रीं राजीनामा याइगु स्वाभाविक खः। उगु इलय् राजीनामा याये नं माः। तर सुयागु नेतृत्वय् गबलय् गज्याःगु सरकार गठन यायेगु धइगु बारे छुं हे सहमति मजूगु अवस्थाय् प्रधानमन्त्रीं राजीनामा बीबलय् उकिं गज्याःगु अस्तव्यस्तता ब्वलंकी धइगु खँ एमालें मसिउगु मखु। एमालेया नेतात स्वयम् हे उकिया अनुभवी खः। उकिं एमालें आः थथें हे प्रधानमन्त्रीया राजीनामा माग यायेगु धइगु देशय् न्हापा थेंज्याःगु हे अस्तव्यस्त अवस्था ब्वलंकेगु कुतः याःगु जुइ।
राजीनामा लिपा छु यायेगु धइगु छुं हे खाका तयार मयासे प्रधानमन्त्रीं राजीनामा बीगु पाय्छि जुइ मखु। लिसें सरकारय् दुगु गठबन्धन छधी जुयाच्वंतले थ्व सरकारयात सुनां चीके धयां चीके नं फइ मखु। यदि देशय् विद्यमान थीथी कथंया अवरोध चीका वनेगु लागिं सकलें दल जानाः राष्ट्रिय सरकार गठन यायेगु स्पष्ट सहमति जुल धाःसा सरकारं याउँक राजीनामा बिया बीमाः।

More Stories Like this