राज्य पुनर्संरचना आयोगयात ज्याकू मलूनि

येँ(सन्ध्या टाइम्स)/सरकारं नकतिनि गठन याःगु राज्य पुनर्संरचना आयोगय् ज्या यायेगु लागिं सहसचिव तहयापिं तक यानाः गुम्ह कर्मचारी बिउगु दु। तर कर्मचारी बिउसां आयोगयात बजेट धाःसा बिउगु मदुनि। लिसें आयोग च्वनीगु ज्याकू नं मबिउनि। सरकारं उकुन्हु अनमिन च्वंगु ज्याकू हे आयोगयात बीगु धाःगु खःसां अन ज्याकू मदुगुलिं आः शान्त व सुरक्षाया ल्याखं नं पाय्छि जूगु ज्याकू मालाच्वंगु खँ धाःगु दु।
आयोग गठन जुइधुंकाः आः थ्वं गय् यानाः ज्या यायेगु धइगु कार्यविधि दयेकेगु ज्या जुयाच्वंगु दु। उकिया मस्यौदा कर्मचारीतय्सं तयार यानाच्वंगु दु। आइतवाः आयोगया न्हापांगु बैठक च्वनेगु धकाः सःतेधुंकूगु दु। वहे बैठकय् कार्यविधिया मस्यौयादा पेश याइगु खँ धाःगु दु।
आयोगया च्याम्ह दुजःत मध्ये म्हिगः न्याम्हेस्यां नियुक्ति पत्र काये धुंकूगु दु। दुजःपिं सावित्री गुरुङ भारत वनाच्वंगु लिसें रमेश ढुंगेल व प्रा. कृष्ण हाछेथुयात लिबाक जक खबर वःगुलिं म्हिगः मलानाः नियुक्ति पत्र काये मखन। संविधानसभा, संघीय मामिला तथा संस्कृति मन्त्रालयया सचिव दिनेश अधिकारीं आइतवाः आयोगया बैठक सःतागु जानकारी बीधुंकूगु दु।
आइतवाः बैठक च्वनेगु धाःसां आयोगया दुजःतय्सं सपथ ग्रहण यायेमाःगु खः लाकि मखु धइगु खँय् धाःसा अन्यौल ब्वलंगु दु। अन्तरिम संविधानय् आयोगया दुजःतय्सं सु-पाखें सपथ ग्रहण यायेगु धइगु खँ स्पष्ट च्वयामतःगु कारणं मन्त्रालयया सचिवं नं थथे हे धाये मफुगु खँ सीदुगु दु। तर कानूनविद्तय्सं धाःसा मेमेगु आयोग थें थ्व आयोगया दुजःतय्सं नं सपथ ग्रहण यायेमाः धकाः राय बियाच्वंगु दु।