सेनाय् वनीपिं लडाकु अप्वल

६५०० संख्याय् पुनर्विचार याये मालीगु अवस्था

येँ (सन्ध्या टाइम्स)/देय्या थीथी शिविरय् थौंकन्हय् जुयाच्वंगु माओवादी लडाकुतय् पुनर्वर्गीकरणय् छम्ह हे लडाकुं पुनर्स्थापना जुइगु विकल्पयात मल्यःगु खनाः राजनीतिक दलया नेतात हे अजूचाःगु दु। आः तक जूगु पुनर्वर्गीकरणय् लडाकुतय्सं कि सेनाय् समायोजन जुइगु, कि मखुसा स्वेच्छिक अवकास कायेगु विकल्पयात जक ल्यःगु दु। थुकिं यानाः सेनाय् वनीपिं लडाकुत अप्वः दत धाःसा अप्वःपिंत छु यायेगु धइगु तकं न्ह्यसः पिहां वःगु खँ धाःगु दु ।

आः समायोजन जुइपिं लडाकुत नेपाली सेना मातहत दयेकीपिं विशेष निर्देशनालय अन्तर्गत च्वनीगु खः। उकी माओवादीया ६५०० म्ह जक लडाकु तयेगु सहमति जूगु दु। छुं जुयाः समायोजनय् वनीपिं अप्वः पिहां वल धाःसा उगु विशेष निर्देशनालयया आकार तःधं याये मालेफु धकाः माओवादी लडाकुया कमाण्डरतय्सं धयाहःगु दु ।

माओवादी कमाण्डर नन्द किशोर पुन 'पासाङं' छुं जुयाः सेनाय् वनीपिं अप्वः पिहां वल धाःसा उमिगु बारे दलतय्सं पुनर्विचार याये मालेफु धकाः धयादीगु दु। अज्याःगु इलय् मेगु कथंया समस्या वइगु जूगुलिं दलतय्सं लडाकुया ल्याः बारे हानं छक्वः बिचाः यायेमाली धयादीगु खः ।

उखे विशेष समितिया दुजः डा. मिनेन्द्र रिजालं धाःसा अज्याःगु अवस्थाय् अप्वः जुया वःपिं लडाकुतय्त पुनर्स्थापनाय् वनेगु लाकि स्वेच्छिक अवकास कायेगु धकाः हानं छक्वः छनौट याकेगु बाहेक मेगु विकल्प मदु धयादीगु दु। न्हापा जुइ धुंकूगु सहमतियात स्यंकल धाःसा उकिं मेथाय् नं लिच्वः लाः वनेफुगु जूगुलिं लडाकुतय्त हानं छक्वः सम्झे यानाः विकल्प ल्ययेकेगु ज्या जुइमाःगु खँ वय्कलं धयादीगु दु ।

उखे स्वेच्छिक अवकासय् वनीपिं नं अप्वः दुगु कारणं सरकारयात बजेट व्यवस्थापन यायेत थाकुइफु धया हःगु दु। स्वेच्छिक अवकासय् वनीपिंत सरकारं एकमुष्ठ दां बियाः विदाई याना छ्वयेमाः। उकिं ध्यबाया समस्या जुइफु धाःगु दु ।