बिगबोसय् पोर्नस्टार व टाइसन

थौंकन्हय् थीथी टीभी रियालिटी शोत स्वकुमितय् नितिं आकर्षण जुयाव:गु अवस्थाय्‍ भारतया कलर्स टीभी च्यानलपाखें न्ह्‍याकाव:गु 'बीग बोस' रियालिटी टेलिभिजन शो नं उतिकं हे चर्चाय्‍ दु । बिग बोस बेलायती टीभी रियालिटी शो बीग ब्रदरया हे मेगु रुप ख: । बिग बोसया आकर्षण थुकिया प्रस्तुति नापं थुकिइ ब्वना हइपिं पाहाँत नं ख: । थुपालय् 'बीग बोस' शोलय्‍ पोर्नस्टार सनी लियोन नं खनेदइगु जूगु दु । अथेहे विश्व प्रसिद्ध बक्सिङ कासामि माइक टाइसनयात नं थुगु ज्याझ्व:या पाहाँ जुइत इनाप छ्‍वये धुंकूगु खँ पिहाँ व:गु दु । रियालिटी शोया आकर्षण उप्वयेकेया नितिं ग्वसा:खल:पिसं विश्वया विवादास्पद व्यक्तित्वनिसें कया: नांजा:पिं सेलिब्रेटी नं थने हयेगु या: ।

न्हापायागु बिग बोस रियालिटी शोलय् विश्व प्रसिद्ध सेलिब्रेटी पामेला एण्डरसन खनेदयेक: वया: सकसितं अजू चायेकाब्यूगु ख: । बीग बोसं थुपाले ब्वनाह:म्ह सनी लियोन अश्लील संकिपाया स्टार ख: । विश्वया अश्लिल संकिपाया झिम्ह (टप टेन) दुने ला:म्ह सनी लियोन भारतीय क्यानाडाली मूलयाम्ह ३० दँ दुम्ह सुन्दरी ख: । न्हापा बिग बोसय्‍ पामला एण्डरसन दुहाँ वयेवं थुगु ज्याझ्व:या टिआरपी ल्या: अप्वयावंगु ख: ।

थथेहे थुपाले लियोनया हुनिं नं टीआरपी उप्वइगु आशा कयात:गु खनेदु । सलमान खान व सञ्जय दत्तं न्ह्‍याकीगु बीग बोसया स्वकुमितय्‍ ल्या: धा:सा उलि बढे जुयाच्वंगु मदु । निर्मातापिसं सनी लियोन शोलय्‍ वये धुंका: थुकिया स्वकुमित अप्वइगु आशा का:गु दु । तर शनी लियोनया सवालय्‍ भचा शंका नं दयाच्वंगु दु । नच्चा ल्याय्‍म्हपिनि नितिं लियोन आकर्षण जुयाच्वंगु दु धा:सा छुं दर्शतय्‍सं पोर्नस्टार नापं सहभागी दइगु ज्याझ्व:पाखे छेँज:नापं च्वना: स्वये मछिनीगु धका: नं धयाह:गु दु । थीथी खँ पिहाँ वयाच्वंसां कि्रयाप्रतिकि्रया वयाच्वंसां 'बीग बोस' शोया निर्मातातय्‍सं स्वकुमितय्‍ नितिं छगू आकर्षण ब्यूगु दु । छगू ललिपप न्ह्‍य:ने क्यना: ह्‍ययेके थें स्वकुमितय्‍त चाकु सवा: फ्‍ययेकेत स्व:गु दु । संसारय् पोर्नस्टारतय्‍त उलि बांला:गु मिखां स्वयेगु मया: । अथे जूसां 'बीग बोसं' पोर्नस्टारयात हे मू आकर्षणया रुपय्‍ ब्वयेगु कुत: याना: टिभी शो चले याइपिन्त छगूकथंया न्हू सवा: बीत स्व:गु खनेदु ।

More Stories Like this