जातीय राज्यया नितिं यूपी विभाजन याइगु
भारतया त:धंगु अले यक्व जनसंख्या दुगु प्रान्त उत्तरप्रदेशयात ४ गु प्रदेशय् विभाजन यायेगु प्रस्ताव युपीया विधानसभां पारित याये धुंकूगु दु । युपीया मुख्यमन्त्री मायावतीं थुगु प्रदेश त:धंगु अले थन यक्व जनसंख्या दुगु हुनिं विकास निर्माण ज्याय् पंग: वइच्वंगु व सुथां लाक्क विकाश निर्माण ज्या न्ह्याकेया नितिं यूपीयात प्यंगु प्रदेश दयेकेमा:गु बिचा: प्वंकूगु ख: । तर विपक्षीतय्सं धा:सा थुगु मुद्दायात कया: विधानसभाय् हंगामा या:गु ख: ।
मू खँ उत्तरप्रदेश (यूपी)यात छाय् थुकथं विभाजन यायेमा:गु बाध्यता वल ले धइगु ख: । खय्तला विकास निर्माणया खँ धा:सां थुकी दुने मेमेगु नं यक्व खँ त सुलाच्वंगु दयेफु । आ: उत्तर प्रदेशयात पूर्वाञ्चल, पश्चिम प्रदेश, बुंदेलखण्ड व अवध प्रदेश दयेकेगु प्रस्ताव पारित या:गु ख: । थ्व प्रदेश विभाजन स्वयेबलय् क्षत्रीयताया आधारय् जूगु विभाजन जातीय आधारं जूगु ख: धा:गु दु । उत्तरप्रदेश दुने दुगु थीथी जातीतय्सं थ:पिनि पहिचान सहितया राज्यया खँ उठे यानाह:गु इलय् मायावती सरकारं थ:पिनि लोकपि्रयता उप्वयेकेत अले थ:पिनि मतदातात थ:पिनि ल्हातिं पित मछ्वयेया नितिं थुकथं निर्णय याना: विधान सभां राज्य हे विभाजन यायेगु प्रस्ताव पारित यागु ख: धका: नं धायेगु या: । थुगु विभाजनया खँ भारतया कांग्रेस (आर्इ) यात तसकं मछिंका व्यूगु दु । उकिं नं थुकिया नितिं थ:पिनि रणनीति पित हयेया लागिं जोडदार रुपं वयेगु तयार यानाच्वंगु दु ।
खय्तला यूपीयात ४ गू प्रदेशया विभाजन यायेया नितिं केन्द्र सरकारं उगु प्रस्तावयात अनुमोदन याये मानि अथे जूसां राज्यं हे राज्य विभाजनया प्रस्ताव पारित याये धुंकूगुलिं केन्द्र सरकारयात नं मछिंका व्यूगु खँ विज्ञपिन्स धा:गु दु । २० करोड जनसंख्या दुगु उत्तरप्रदेशय् थांैकन्हय् ४०३ विधायक दुगु संसद दु । थुकी मायावतीया नेतृत्वय् दुगु बहुजन समाजया सीट ल्या: २२० दु । उत्तरप्रदेश विभाजनया प्रस्ताव जातिय आधारं व:गु हुनिं संघीयता जातिय आधारय् जुइमज्यू धार्इपिं नेपा:या थीथी दलया नेता व विज्ञ धा:पिन्त नं झस्के याना व्यूगु दु धा:सा थुगु प्रस्तावं याना: जातिय भाषिक पहिचान सहितया प्रदेशया माग याना वयाच्वंपिं जनजाति मधेशी समुदाययात थुकिं थप उर्जा व्यूगु खनेदु । थुखे पाखे नं नेपा:या संविधान सभां शिक्षा कायेमा:गु खनेदु । अथे हे भारतया थीथी थासय् जातिय दमनया कारण जातिय राज्यया माग उप्वया व:गु दु । थुकिया छुमांया रुपं पश्चिम वंगालय् गोर्खाल्याण्ड, आसामय्, बोडोल्याण्ड, नागाल्याण्डय् अले आन्ध्रप्रदेशय् तेलङ्गाना राज्यया माग तसकं शसक्तरुपं उठे जुयाच्वंगु दु । थुकिं नं इलय् हे जातिय राज्यया सम्बोधन मजुल धा:सा लिपा वना: न्ह्यागु नं कथंया परिस्थिति विकास जुया वनेफु । उकिं देशय् राज्यपुनर्संरंचना आयोगया खँ उठे जुया च्वंबलय् उत्तरप्रदेश धका: धस्वानाच्वंगु भारतया छगू प्रदेशयात जातीय प्रदेशया आधारं ४ गू प्रदेश दयेकेगु प्रस्ताव पारित या:गु खँय् नं बिचा: यायेमा:गु खनेदु ।
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
