देउवापाखें थौंया बैठक बहिष्कार
भुइजःसिइ देउवाया केन्द्रीय दुजःतय् बिस्कं मुँज्या
येँ (सन्ध्या टाइम्स)/प्रमुख प्रतिपक्षी दल नेपाली कांग्रेसया थौं च्वनीगु केन्द्रीय कार्यसमितिया बैठक बरिष्ठ नेता शेरबहादुर देउवा पक्षया केन्द्रीय नेतातय्सं बहिष्कार याइगु जूगु दु ।
पार्टी दुने ब्वलंगु कचवं ज्यंकेत खँल्हाबल्हा याये माल धकाः यानागु आग्रहयात सभापति सुशील कोइरालां बेवास्ता याःगुलिं देउवा पक्षं थौंया केन्द्रीय बैठक हे बहिष्कार यायेगु निर्णय याःगु खः। थौं सुथय् भुइजःसिइ देउवाया छेँय् च्वंगु देउवा पक्षीय केन्द्रीय दुजःतय् बैठकं थ्व निर्णय याःगु खः ।
थौं सुथय् तक नं वार्ताया माध्यमं समस्या समाधान याइ ला धकाः देउवा पक्षीय नेतात पियाच्वंगु खःसां सभापति कोइरालां वास्ता मयायेवं उमिसं बैठक बहिष्कारया निर्णय याःगु खः। कांग्रेस केन्द्रीय कार्यसमितिया बैठक थौं सनिलय् पार्टीया मू ज्याकू सानेपाय् च्वनेगु कथं सःतातःगु दु ।
म्हिगः नं देउवा पक्षधर करिब २० म्ह केन्द्रीय दुजःत सभापति कोइरालाया छेँय् वार्ता याये धकाः वंबलय् कोइरालां नाप तकं मलासे लित छ्वया हःगु खः।
देउवा पक्षं छुं ई न्ह्यः पार्टीं थीथी भातृ संगठन विघटन याःगु निर्णय लित कायेमाः धकाः माग याना वयाच्वंगु दु। उगु माग पूरा मजूसा केन्द्रीय कार्यसमितिया बैठक बहिष्कार यायेगु धकाः तःन्हु न्ह्यवंनिसें देउवा पक्षं ख्याच्वः बियाः वयाच्वंगु खः ।
वंगु असोजया न्हापांगु वालय् च्वंगु कांग्रेसया केन्द्रीय बैठकय् बहुमतया आधारय् सभापति कोइरालां देउवा पक्षया नेतृत्वय् दुगु नेपाल तरुण दल, महिला संघ, आदिवासी जनजाति संघ लगायत न्यागू भातृ संगठन विघटन यायेवं पार्टीया ल्वापु तच्वया वंगु खः। उगु घटनायात कयाः भातृ संगठनया नेता व कार्यकर्ता आमरण अनसनय् तकं च्वंगु खः। अय्नं पार्टीं खँ मन्यनेवं नेता शेरबहादुर देउवां केन्द्रीय सदस्य पदं राजीनामा हे बियादीगु खः। वय्कःया राजीनामायात पार्टीं अस्वीकार याःसां देउवा धाःसा पार्टी बैठकय् वंगु मदुनि ।
वंगु असोजय् ब्वलंगु विवाद लिपा कांग्रेस केन्द्रीय कार्यसमितिया बैठक थौं न्हापांखुसी च्वनेत्यंगु खः। तर बैठकय् देउवा लगायत वय्कः पक्षधर सुं हे केन्द्रीय दुजःत मवनीगु जुइवं बैठक च्वनाया अर्थ मदइगु दावी देउवा पक्षं यानाच्वंगु दु। देउवाया पक्षय् करिब २५ म्ह केन्द्रीय दुजःत दु। वय्कःपिं अप्वः यानाः पुलांगु प्रजातान्त्रिक कांग्रेसय् दुपिं हे नेतात खः ।
