आयोग गठनं ब्रम्हूवादीतय् कपाः स्याना वल
राज्य पुनर्संरचना आयोग
येँ (सन्ध्या टाइम्स)/आपालं वादविवाद लिपा अन्ततः राज्य पुनर्संरचना आयोग गठन जूगु दुसा आयोग गठनया नापनापं ब्रम्हूवादीतय् कपाः नं स्याना वःगु दु।
आयोग गठन जुइवं हे उकी च्वंपिं जनजाति दुजःतय्त कयाः ब्राम्हणवादीतय्सं नागःतुगः याना हःगुलिं हे आयोग गठन उमित मयल धइगु पुष्टि जूगु खः। आयोगय् पहिचानया लिधंसाय् प्रदेश दयेकेमाः धाइपिं दुजःत अप्वः दुगुलिं ब्राम्हणवादीतय्सं आयोगया आलोचना याना हःगु खः ।
आयोगय् दुथ्याःपिं च्याम्ह दुजःत मध्ये नेपाली कांग्रेसं सिफारिस याःम्ह डा. रमेश ढुंगेल छम्ह धाःसा पहिचान जक मखु संघीय व्यवस्थाया हे विरोधी खः। नेपाःया लागिं गज्याःगु संघीय व्यवस्था पाय्छि जुइ धकाः सुझाव बीत गठन याःगु आयोगय् संघीय व्यवस्थाया हे विरोधी मनूयात सिफारिस याना हःगुलिं राज्य पुनर्संरचना बारे कांग्रेसया दुखँ छु जुयाच्वन धइगु प्रस्ट जूगु टिप्पणी थन याना हःगु दु ।
उखे एमालें सिफारिस याना हःम्ह सर्वराज खड्का क्षेत्री समाजया सक्रिय दुजः हे जूगु कारणं वय्कलं नं राज्य पुनर्संरचनाया वहसय् विवाद पिकायेफुगु अनुमान जुयाच्वंगु दु ।
माओवादीं सिफारिस याना हःम्ह स्टेला तामाङ जनजाति आन्दोलनया न्ह्यलुवा भाजु परशुराम तामाङया कलाः खः। आयोग दुने वय्कः व माओवादीपाखें हे सिफारिस जुयावंम्ह नेवाः न्ह्यलुवा मल्ल के. सुन्दर दथुइ धाःसा नेवाः व तामाङ प्रदेशया लागायात कयाः विवाद जुइफुगु अनुमान दु ।
भाजु मल्ल धाःसा आयोगय् कृष्ण हाछेथु थेंज्वःम्ह विज्ञ नं दुगुलिं आयोगं बांलाक ज्या याये फइ धइगुली आशावादी जुयादीगु दु। मल्ल नेवाः प्रदेश सुनिश्चित जुइमाः धकाः आन्दोलन यानाच्वंगु नेवाः स्वायत्त राज्य मंकाः संघर्ष समितिया छम्ह नेतृत्वकर्ता नं खः। आः राज्य पुनर्संरचना आयोग गठन जुइधुंकाः नेवाः स्वायत्त राज्य मंकाः संघर्ष समितिं नेवाः राज्यया सुनिश्चित जुइमाः धकाः पिने च्वनाः दवाव बीसा थः दुने वनाः दवाव बीगु खँ वय्कलं कनादीगु दु ।
'सन्ध्या टाइम्स'लिसे खँ ल्हासें वय्कलं धयदिल, 'आयोगय् वनाः ज्या यायेगु अवसर नं झीगु लागिं आन्दोलनया हे छगू ब्व खः। नेवाःतय्सं ल्ह्वना वयाच्वंगु सम्पूर्ण खँ आः सम्बन्धित थासय् दुने हे वनाः तः वनेगु जुइ ।'
