नेमकिपाया टेलिभिजन स्टेशन
ख्वप (सन्ध्या टाइम्स)/ नेमकिपां नं थःगु हे अलग्ग टेलिभिजन स्टेशन तइगु जूगु दु। नेमकिपा अध्यक्ष नारायणमान बिजुक्छेँ रोहितं ख्वपय् सांस्कृतिक गुरुपिंत हनेगु व तःमुँज्याया सांस्कृतिक विधाय् उत्कृष्ट पुचःयात सिरपाः लःल्हायेगु ज्याझ्वलय् न्ववासें उगु खँ कनादीगु खः। आः तक नेमकिपां ख्वपय् न्हिपौ, वाःपौ व ओम साई नेकवर्कय् ई न्यानाः ज्याझ्वः चले यानाच्वंगु दुसा आः थःगु हे रेडियो व टेलिभिजन स्टेशन तयेगु तयारी यानाच्वंगु खः ।
थगुने नं वय्कलं थज्याःगु हे ज्याझ्वलय् थःपिनि लागतय् याकनं हे रेडियो व टिभी स्टेशन तयेगु खँ कनादीगु खः। २०५४ सालय् स्थानीय निर्वाचनय् हे ख्वप नपाय् थःपिं त्यात धाःसा ख्वप एफ.एम., ख्वप कलेज व ख्वप विश्वविद्यालय चले यायेगु बचं नेमकिपां बिउगु खः। ख्वप कलेज व ख्वप इन्जिनियरिङ्ग कलेज सफलतापूर्वक चले यानाच्वंगु दुसा ख्वप एफ.एम.या खँ धाःसा ध्याकुनय् हे लानाच्वंगु दनि ।
