अन्ततः आयोग गठन जुल

अन्ततः सरकारं बल्लबल्ल राज्य पुनर्संरचना आयोग गठन यायेत सफलता चूलाकूगु दु। यद्यपि आयोगया नायः सु जुइ धइगु निर्णय याये मफयाः नियुक्त जूपिं च्याम्ह दुजःत हे पालंपाः नायः जुइगु धकाः व्यवस्था याःगु दु। तर न्ह्यागु कथं गठन याःगु खःसां संविधान च्वयेगु ज्याय् दकलय् कठिन विषय जुयाच्वंगु राज्य पुनर्संरचनायात अन्तिम निष्कर्ष बीगु लागिं आयोग दयेकेगु ज्या जुल, थ्वहे लसताया विषय खः ।

आः गठित आयोगय् नेपाःया भूगोल व संघीय व्यवस्थाया विज्ञ जक मखु जाति भाषा आन्दोलनया ख्यलय् सक्रिय व्यक्तित्वत नं दुथ्याःगु कारणं आयोगया संरचना सन्तुलित खनेदु। आयोगया दुजःतय् ख्वाःपाः स्वयेबलय् वय्कःपिंसं देय्या आदिवासी जनजातितय्सं गुकथंया संघीय व्यवस्थाया माग यानाच्वंगु खः, उकी उमित निराश याइगु अवस्था खने मदु। वास्तवय् दलतय्सं नियुक्त याना हःपिं मनूतय् ख्वाःपालं हे सम्बद्ध दलत गज्याःगु संघीय व्यवस्थाया पक्षय् दु धइगु खँया संकेत बिउगु खनेदु ।

नेपालय् संघीय व्यवस्थाया माग यानाच्वंपिं मूलतः आदिवासी जनजाति पुचः खः। आः गठित आयोगय् उमिगु माग प्रति अप्वः सतीपिं मनूत दुथ्याः। उकिं आयोगया लिच्वः आशा यानातः थें वइ धकाः भलसा कायेफु। खतुं देशय् थुगु आयोगय् दुथ्याःपिं स्वयां नं धुरन्धर विज्ञत मदुगु मखु। वय्कःपिं आयोगय् दुथ्याये मफुसां आयोगपाखें ज्या न्ह्याकेबलय् वय्कःपिनिगु बिचाः नं अवश्य हे काइ जुइ। लिसें आयोगं हे लिच्वः बीगु जूगुलिं दलतय्सं नं थःपिनि दुने वयाच्वंगु विवादयात आयोगपाखे चीकाः न्ह्याः वनेगु अवसर काये खनी ।

More Stories Like this