पोखराया भाषासेवी

सर्वज्ञमानयात बाखं दबुलिं हननेपाःया नांजाःम्ह संगीतविज्ञ अले कला व संस्कृतिया हामा भाषासेवी भाजु सर्वज्ञमान प्रधानाङ्गयात छगू समारोह यासें बाखं दबुलिं हंगु दु। वंगु कछलागा १० आइतवाः सुथय् पोखराया भैरव सांस्कृतिक संरक्षण समितिया भवनय् बाखं दबूया नायः लक्ष्मण राजवंशीया सभापतित्वय् थुगु हनेज्याझ्वः जूगु खः। मूपाहां जुयाः झायादीम्ह पुनरावेदन अदालत पोखराया माननीय नायाधीश विश्वम्भर प्रसाद श्रेष्ठं त्वाःदेवाय् मत च्याकाः ज्याझ्वःया उलेज्या यानादिसें भाजु सर्वज्ञमानयात अभिनन्दन यानादीगु खः। बाखं दबूपाखें च्वमि राजा शाक्यं लसकुस यानादीगु ज्याझ्वलय् दबूया म्हसीका प्रा. नर्मदेश्वर प्रधानं बियादीगु खः। सर्वज्ञमान प्रधानाङ्गया म्हसीका शरद कसाःनं न्ह्यब्वयादिलसा अभिनन्दन-पौ सरस्वति तुलाधरं ब्वनादीगु खः। भैरव सांस्कृतिक संरक्षण समितिपाखें द्यःल्हानाः न्ह्याःगु ज्याझ्वलय् दथुइ म्ये हालामि पवित्र कसाःनं थीथी म्येँ हालादीगु खः ।

ज्याझ्वलय् मूपाहां विश्वम्भर प्रसाद श्रेष्ठं थःपिंसं थीथी हुनिं थःपिनि मांभासं खँल्हाये मसःसां थजाःगु ज्याझ्वलय् वये दयाः मांभाय् बारे यक्व खँ सीके दुगुलिं थः तसकं लय्ताःगु खँ कनादिल। सम्मानित व्यक्तित्व सर्वज्ञमान प्रधानाङ्ग, प्राज्ञकवि तीर्थ श्रेष्ठ, नेवाः लोकतान्त्रिक संघया मनकाजी श्रेष्ठ, कृष्ण भक्त बोडेपिंसं नुगःखँ प्वंकादीगु खः ।

स्वनिगलं झाःपिं सकसिनं भाजु सर्वज्ञमानयात खादां क्वखायेकाः, थःपिनि कृति देछायाः व बाखं दबूपाखें बेतालिं चिकाः, दोसल्लां न्ययेकाः हनेज्या यात सा भैरव सांस्कृतिक संरक्षण समितिपाखें कृष्णदेव प्रधानाङ्गं बाखं दबूयात लुमन्ति चिं लःल्हानादिल। दबुली दीपिं सकल पाहांपिंत ख्यें सगं बीगु व उपस्थित सकसितं सिन्हः तिकाः ह्याउँ क्वखा लःल्हाःगु खः। ज्याझ्वलय् राजितबहादुर श्रेष्ठया सम्पादनय् यलं पिदंगु 'हिसु' दँपौया खुगूगु ल्याः मूपाहांपाखें पितब्वज्या नं जूगु खः ।

पोखरा नेवाः समाजया नायः प्रकाश पालिखें सुभाय् देछायादीगु थुगु ज्याझ्वः क्वचायेकादीगु झ्वलय् लक्ष्मण राजवंशीं बाखं दबुलिं साहित्यिक ज्याझ्वः यायेगु नापं थुकथं हनेबहःपिं न्ह्यलुवापिंत हनाबना देछायाः वय्कःपिनिगु सुवाः कायेगु नेवाःतय्गु परम्पराबारे नुगःखँ प्वंकादीगु खः ।

थ्वयां न्ह्यः बाखं दबूया जःपिं शनिवाः पोखरा थ्यंकः वंगु खः। वकुन्हु हे बहनी पोखराया स्वास्थ्य शिक्षा तालिम केन्द्रया हलय् छगू बाखं गोष्ठी जुल। प्रा. नर्मदेश्वर प्रधान व उपन्यासकार शशिकला मानन्धरं मंकाः कथं न्ह्याकादीगु थुगु गोष्ठीइ बाखं च्वमिपिं छसिकथं सुजिता माःजु, सौरभ शाक्य, राजा शाक्य, सरस्वति तुलाधर, भगतदास श्रेष्ठ, तिलक प्रकाश कायस्थ, श्याम आशा, लक्ष्मण राजवंशी, बुद्ध नेवाः, गोविन्दमान श्रेष्ठ, कृष्णभक्त बोडे, शरद कसाः व केदार सितुपिंसं थःथःपिनि बाखं ब्वनाः न्यंकादीगु खः ।

गोष्ठीइ नांजाःम्ह उपन्यासकार व बाखंच्वमि मथुरा साय्मिं अन हे बाखं ब्वनादीपिं मध्यय् बांलाःगु वाचनकलायात द्वःछि व नीतका दां सिरपाः बीगु घोषणा याः कथं समालोचक पुष्पबहादुर चित्रकार व शाक्य सुरेनया मंकाः क्वःछिनाय् थुगु सिरपाः शरद कसाःयात लःल्हानादिल। नापं सिरपाःया दां पाय्छि जुइक च्वःपिं केदार सितु व भगतदास श्रेष्ठयात दामासाही कथं म्हतिं न्हय्सःत्या न्ह्यसःत्याः दां नं लःल्हानादीगु खः।
ज्याझ्वलय् बाखं सम्बन्धी अन्तर्क्रिया नं जूगु खः ।

More Stories Like this