जुजुया विरुद्ध सन्देश छ्वम्हेसित नीदँया जेल सजाँय

थाइल्याण्डया जुजु भूमिबोलया विरुद्धय् सन्देश (एसएमएस) छ्वम्ह छम्ह थाई नागरिकयात नीदँया जेल सजाँय न्यंकूगु दु । थाइल्याण्डया जुजु भूमिबोल अद्युल्यादेजया मानहानी जुइ कथंया सन्देश छ्वःगु धासें अनया अदालतं बुधवाः उगु सजाँय न्यंकूगु बुखँय् न्ह्यःथनातःगु खः ।

थाई नागरिक अम्पोन ताङ्गनोपाकुलयात उम्ह मनुखं छ्वःगु उगु सन्देशपाखें अनया जुजुया मानहानी जूगु दाबी यासें अनया अदालतं बुधवाः उगु सजाँय न्यंकूगु धाःगु खः । सन् २०१० या मे महिनाय् उम्ह नागरिकं तत्कालिन प्रधानमन्त्री अभिजित भिजाजिभाया स्वकीय छ्याञ्जेयात वयागु मोबाइल फोनय् उगु सन्देश छ्वःगु खः ।

बैंककया छगू अपराधिक मुद्दा स्वइम्ह अदालतं वयात थाइल्याण्डय् विद्यमान राजसंस्थाया सम्मान सम्बन्धी कानुन कथं दोषी तायेकूगु धाःगु खः । अदालतं थ्वहे त्वहलय् वयात दोषी तायेकूगु दु व नीदाया सजाँय ब्यूगु दु - वय्कःया वकिल अनोन नामपां धाःगु खः । वय्कःया कथं आः उगु निर्णयया विरुद्ध स्वीन्हुया दुने पुनरावेदन यायेगु नं अधिकार दुगु वकिलया धापू खः । राजतन्त्रात्मक देय् थाईल्याण्डय् जुजुया मानहानी जुइ कथंया ज्वलंत प्रकाशन व प्रशारण यायेत प्रतिबन्ध याःगु दु ।

More Stories Like this