आयोगया अध्यक्ष नं पालंपाः?
येँ (सन्ध्या टाइम्स)/सरकारं म्हिगः हे गठन यायेमाःगु राज्य पुनर्संरचना आयोग थौं तकं गठन याये मफुनि। आयोगया अध्यक्ष सुयात दयेकेगु धइगु खँय् दलया नेतातय् दथुइ तःधंगु 'हानथाप' जुयाच्वंगुलिं आयोग गठनया ज्या न्ह्यःने न्ह्याः वने मफयाच्वंगु खः।
थुकिया निंतिं म्हिगः च्वंगु थीथी दलया बैठकय् आयोगया अध्यक्ष जुइपिं धकाः थीथी मनूतय् नां प्रस्तावित जूगु खःसां उकी सुयां हे नामय् सहमति मजुइवं बैठक अथें दिका छ्वःगु खः ।
आयोगया अध्यक्ष ल्ययेगु लागिं थौं नं स्वंगू तःधंगु दल व मोर्चाया दथुइ बैठक च्वनाच्वंगु दु। बैठकं थौं हे आयोग गठन याइ धाःसां न्हिनय् १ बजे तक छुं निर्णय जुइ फुगु मदुनि। पार्टीतय्सं आयोगया अध्यक्ष स्वतन्त्र मनूयात तयेमाः धकाः धाःसां नं नां हइबलय् धाःसा थःत समर्थन याइम्ह 'स्वतन्त्र' मनूया नां हइगुलिं मेगु दलतय्सं स्वीकार मयाइगु अवस्था जुयाच्वंगु खः ।
सुयां हे नांयात कयाः निर्णय याये मफयेवं आः आयोगया अध्यक्षता हे थीथी दलपाखें पालंपाः ग्रहण यानाः वनेगु खः लाकि धइगु प्रस्ताव वयाच्वंगु खँ सीदुगु दु। सिंहदरवार दुने शान्ति मन्त्रालयय् च्वनाच्वंगु उगु बैठकय् थथे पालंपाः अध्यक्षता ग्रहणया प्रस्ताव वःगु खः। दलतय्सं छुं ई थुगु प्रस्तावय् नं सहलह याःगु खँ सीदुगु दु। तर निर्णय धाःसा जूगु मदुनि ।
आयोगया अध्यक्ष सुयात तयेगु धकाः दलतय् दथुइ तःधंगु विवाद जुयाच्वंसां दलया बैठकं निर्णय याःम्ह मनुखं अध्यक्ष जुइत स्वीकार याइ लाकि याइ मखु धइगु मेगु समस्या धाःसा अझं दनिगु खँ सूत्रं धाःगु दु ।
