सुगत सौरभयात तोशिहिदा बुक अवार्ड
येँ (सन्ध्या टाइम्स)/कविकेशरी चित्तधर 'ह्दय'या नांजाःगु महाकाव्य 'सुगत सौरभ' या अंग्रेजी अनुवाद सफूयात अमेरिकाया क्यालिफोर्निया विश्वविद्यालय सेन्टर फर बुद्धिष्ट स्टडिजपाखें 'तोशिहिदा नोमिता बुक अवार्डं' सम्मानित याःगु दु ।
चित्तधर 'ह्दयं' च्वयादीगु उगु कृतियात भाजुपिं टड लिविस व सुवर्णमान तुलाधरपिंसं अंग्रेजी भासं अनुवाद यानाः 'सुगत सौरभ: एन इपिक पोयम फ्रम नेपाल अन द लाइफ अफ द बुद्ध बाई चित्तधर' नामं पिथनादीगु खः।
अंग्रेजी सफूयात लाःगु थुगु अवार्डय् झिद्वः अमेरिकी डलर दां दइ। सन् १९१० य् पिदंगु उगु सफुलिं बुद्ध धर्म अध्ययनया ख्यलय् ज्वः मदुगु योगदान जुइ फइ धकाः निर्णायक समितिं ठहर यासें उगु अवार्डं छाय्पीगु निर्णय याःगु खः। बुद्ध धर्मलिसे सम्बन्धित उत्कृष्ट सफूयात ल्ययाः दँय् छक्वः उगु सिरपाः बीगु याइ। थुगुसी बिउगु थ्व सिरपाः निक्वःगु खः ।
सिरपाः लःल्हाइगु समारोहय् अनुवादक टड लिविस झायाः सिरपाः ग्रहण यानादीगु खः। उगु ज्याझ्वलय् न्ववासें वय्कलं कवि चित्तधर ह्दयं यानादीगु सिर्जना वास्तवय् विश्वया न्ह्यःने हे ब्वयेछिं धइगु खँ थ्व सिरपालं स्पष्ट जुल धासें थ्व काव्ययात अंग्रेजी भासं अनुवाद यायेगु लागिं ह्दयं थःत सन् १९८२ स इनाप याःगु व अबलय्निसें हे ज्या न्ह्याकागु खँ कनादिल। वयां लिपा सुवर्णमान तुलाधरलिसे जानाः थुकियात अन्तिम रुप बीगु लागिं थःपिंसं ३६५ पेजया उगु सफू ३८ क्वः तक लिसा लिसा कयाः ब्वनागु रोचक प्रशंग नं भाजु लिविसं न्ह्यथनादिल ।
